USAID სამართლის უზენაესობის პროგრამის მხარდაჭერით, საქართველოს მედიატორთა ასოციაციამ და საქართველოს ადვოკატთა ასოციაციამ თბილისში მესამე ყოველწლიურ საერთაშორისო ფორუმს - მედიაცია იურისტებისთვის უმასპინძლეს.

ღონისძიება საქართველოში მედიაციის პრაქტიკის განვითარებას მიეძღვნა, რამაც საშუალება მისცა პრაქტიკოს იურისტებს უკეთ გაეგოთ, თუ რა უპირატესობები გააჩნია მედიაციას. ფორუმის 65 მონაწილეს შესაძლებლობა ჰქონდა გამოცდილი მედიატორების, იურისტებისა და მოსამართლეებისგან გაეზიარებინათ პრაქტიკული გამოცდილება იმის შესახებ, თუ როგორ უნდა მოხდეს მედიაციის პრაქტიკაში გამოყენება.   

ფორუმს გახსნითი სიტყვით მიმართა ირაკლი ყანდაშვილმა, საქართველოს მედიატორთა ასოციაციის თავმჯდომარემ, რომელმაც აღნიშნა, რომ მედიაციის შესახებ კანონი საქართველოში ოთხი წლის წინ იქნა მიღებული, რაც ამჟამად საშუალებას იძლევა, რომ დავები უფრო ეფექტიანი და ჰუმანური მეთოდის დახმარებით შეთანხმებით დასრულდეს.

გიორგი ჩხეიძემ, USAID სამართლის უზენაესობის პროგრამის ხელმძღვანელმა ხაზი გაუსვა პროგრამის ადამიანებზე ორიენტირებულ მართლმსაჯულებაზე ხელმისაწვდომობის ხელშეწყობის მიმართულებით განხორციელებულ საქმიანობას და ამ ძალისხმევაში მედიაციის უფრო ფართოდ გამოყენების მნიშვნელობას.  

მარია სლაზაკმა, ევროპის ადვოკატთა ასოციაციის პრეზიდენტმა და დავით ასათიანმა, საქართველოს ადვოკატთა ასოციაციის თავმჯდომარემ ხაზგასმით აღნიშნეს იურისტების როლი მედიაციის მხარდაჭერის საქმეში. დავით ასათიანის განცხადებით, რადგან საქართველოს ადვოკატთა ასოციაციას 5,500 მოქმედი წევრი ჰყავს, მედიაციის უფრო ფართოდ გამოყენება მხოლოდ იურისტების მხარდაჭერით იქნება შესაძლებელი.  

მაიკლ მაკილვრათმა, USAID სამართლის უზენაესობის პროგრამის მიერ მოწვეულმა მედიაციის საერთაშორისო ექსპერტმა მთავარი მოხსენება თემაზე „მედიაციის ევოლუცია სამართლებრივ პრაქტიკაში“ წარმოადგინა. მსოფლიოს სხვადასხვა ქვეყანაში მუშაობით მიღებული გამოცდილების საფუძველზე, მაიკლ მაკილვრათმა მედიაციის დინამიურ ბუნებაზე ისაუბრა. მისი მოხსენების შემდგომ პანელური დისკუსიები მედიაციის სხვადასხვა ასპექტს შეეხო. პირველ პანელში მონაწილეობას ღებულობდნენ საქართველოს ადვოკატთა ასოციაციის, თბილისის საქალაქო სასამართლოს, თსუ დავის ალტერნატიული გადაწყვეტის ეროვნული ცენტრის, ნიუ ვიჟენ უნივერსიტეტის სამართლის ფაკულტეტის და საქართველოს იურიდიული დახმარების სამსახურის წარმომადგენლები. მეორე სესია ადვოკატის, როგორც მედიაციის პროცესში წარმომადგენლის გამოცდილების გაზიარებასა და სარგებლის განხილვას დაეთმო, რომელსაც ადვოკატები მედიაციის საშუალებით იღებენ. მასში იურიდიული კომპანიებისა და ფირმების წარმომადგენლები მონაწილეობდნენ. მესამე სესიისას მედიაციის პროცესის დროს ადვოკატთა ეთიკური მოვალეობების შესახებ იმსჯელეს, რომელშიც მონაწილეობა საქართველოს ადვოკატთა ასოციაციისა და საქართველოს მედიატორთა ასოციაციის ეთიკის კომისიების წარმომადგენლებმა მიიღეს.  

ფორუმი აქტიური კითხვა-პასუხის სესიით დასრულდა, სადაც მედიაციის სხვადასხვა ასპექტი განიხილეს.