თბილისის საქალაქო სასამართლოს მოსამართლე და სამართლის უზენაესობის პრაქტიკის ჯგუფის წევრი, მოსამართლე თამარ ჩიხლაძე რუსთავის #4 საჯარო სკოლაში 90-ზე მეტ საშუალო სკოლის მოსწავლეს შეხვდა.

მოსწავლეები ქალაქი რუსთავის ოთხი საჯარო სკოლიდან შეიკრიბნენ. USAID სამართლის უზენაესობის პროგრამა და USAID-ის სამოქალაქო განათლების პროგრამა ერთობლივად აორგანიზებენ მოსამართლეებისა და საშუალო სკოლის მოსწავლეების საინფორმაციო შეხვედრებს მოსამართლის პროფესიის პოპულარიზაციისთვის, ახალგაზრდა თაობასა და სასამართლო სისტემას შორის დიალოგის წახალისებისთვის და  ადამიანის უფლებების საკითხებზე ახალგაზრდა თაობის ცოდნის ამაღლებისთვის.

შეხვედრის დასაწყისში მოსწავლეებმა წარმოადგინეს პლაკატები, რომლებიც ეძღვნებოდა ადამიანის უფლებათა თემებს, მათ შორის გენდერულ თანასწორობასა და ოჯახში ძალადობას. მათ აგრეთვე გამართეს მოკლე პრეზენტაციები, სადაც ისაუბრეს თავიანთი ჩართულობის შესახებ ადამიანის უფლებათა დაცვის ინიციატივებსა და კამპანიებში.

შეხვედრაზე თამარ ჩიხლაძემ ისაუბრა ინდივიდუალური მოსამართლის როლსა და პასუხისმგებლობაზე, არასრულწლოვანთა დაცვის სამართლებრივ გარანტიებზე, ადრეული ქორწინების პრობლემებსა და მისი აკრძალვის მიზეზებზე.

თამარ ჩიხლაძემ იმსჯელა აგრეთვე ადამიანის უფლებათა ევროპულ სამართალზე, განსაკუთრებით ადამიანის უფლებათა ევროპულ კონვენციაზე და კონვენციით დაცულ ისეთ ფუნდამენტურ ღირებულებებზე, როგორიცაა თანასწორობა, არჩევანის თავისუფლება და მოწყვლადი ჯგუფების დაცვა. მოსამართლემ ყურადღება გაამახვილა  სამართლის სისტემის მუდმივ განვითარებაზე და მუდმივი სწავლისა და ადაპტაციის მნიშვნელობაზე წარმოშობილი სამართლებრივი პრობლემების გადასაჭრელად. მას მოსწავლეებთან ერთად იმსჯელა აგრეთვე მნიშვნელოვან საკითხებზე ქალთა უფლებების სფეროში.