2024 წლის 17 აპრილს, ამერიკელმა მოსამართლემ მინესოტას შტატიდან - ტიმოთი ბალანდმა, რომელიც USAID სამართლის უზენაესობის პროგრამის (პროგრამის) ფარგლებში მოსამართლეთა გაცვლითი მიმართულების აქტივობაში იღებს მონაწილეობას, გორის სახელმწიფო უნივერსიტეტის სოციალურ მეცნიერებათა, ბიზნესისა და სამართალმცოდნეობის ფაკულტეტის სტუდენტებს წაუკითხა ლექცია თემაზე ახალგაზრდების როლი მართლმსაჯულების განვითარების ხელშეწყობის პროცესში.

მისასალმებელ სიტყვაში გორის სახელმწიფო უნივერსიტეტის პროფესორმა, ივანე ბალახაშვილმა მადლობა გადაუხადა პროგრამას ამ ღირებული შესაძლებლობისთვის. მან ხაზგასმით აღნიშნა, რომ უნივერსიტეტი მიესალმება ნებისმიერ მომავალ აქტივობას, რომელიც მიმართული იქნება სტუდენტების უნარებისა და ცოდნის გაუმჯობესებაზე.

მოსამართლე ბალანდმა ლექცია დაიწყო მინესოტას შტატის სასამართლო ოლქის რუქების განხილვით, სადაც წარმოდგენილი იყო სასამართლო სისტემის განსჯადობის სტრუქტურა შტატის თითოეულ ოლქში.

სტუდენტების ინტერაქტიულ-როლურ თამაშში ჩართვით, მოსამართლე ბალანდმა ნათლად წარმოუდგინა მონაწილეებს აშშ-ს სასამართლო დარბაზებში დამკვიდრებული ქცევის წესები და სასამართლო პროცესში მონაწილე და დამსწრე პირების ჩაცმა-დახურვის მკაცრ კონტროლზე ისაუბრა. შეხვედრის მონაწილეებს მან ასევე განუმარტა აშშ-ში იურიდიულ პროფესიაში შესვლის საჭირო დეტალები და საფეხურები. რამდენიმე მონაწილემ სასამართლოს მანდატურის როლი მოირგო, რა დროსაც ისინი სასამართლო დარბაზში დადგენილი ქცევის წესების დემონსტრირებას ცდილობდნენ. ლექციის დასასრულს სტუდენტებმა დამატებითი პრაქტიკული სავარჯიშო შეასრულეს, სადაც სტუდენტები მოსამართლის ამპლუაში ჰიპოთეტური საქმის განხილვისას გადაწყვეტილებას იღებდნენ მითითებული ფაქტობრივი გარემოებების საფუძველზე. სტუდენტებმა აღნიშნეს, რომ სავარჯიშოებმა მათ საშუალება მისცა დეტალურად გაეაზრებინათ სხვადასხვა იურიდიული პროფესიის ნიუანსი და რეალური წარმოდგენა შეუქმნათ აღნიშნულის მიმართ.