მოსამართლე ციცინო კიკვაძე ახალგაზრდებს ქალთა უფლებების შესახებ ესაუბრა
ახალგაზრდებმა უნდა იცოდნენ ქალთა უფლებების შესახებ, რადგან ეს ხელს უწყობს გენდერულ თანასწორობას და აძლევს მათ შესაძლებლობას გახდნენ ინფორმირებული და პასუხისმგებლიანი მოქალაქეები, გაუჩნდეთ თანაგრძნობა ქალების მიმართ.
USAID სამართლის უზენაესობის პროგრამა ატარებს შეხვედრებს მოსამართლეებსა და სკოლის მოსწავლეებს შორის, რათა დაეხმაროს ახალგაზრდებს გაეცნონ ქალთა უფლებებს და პროფესიონალებისაგან მოისმინონ შესაბამისი მაგალითები.
2023 წლის 4 ნოემბერს, მოსამართლე ციცინო კიკვაძე, ტყიბულისა და წყალტუბოს მაგისტრატი მოსამართლე, ასევე ქუთაისის საქალაქო სასამართლოს მოსამართლე, „წიგნების თაობაში“ 60 სკოლის მოსწავლეს შეხვდა. „წიგნების თაობა“ არის ინიციატივა, რომელსაც ხელმძღვანელობენ ქუთაისში სამოქალაქო განათლების მასწავლებლები და შექმნილია კითხვისადმი სიყვარულის გასაღვივებლად და სკოლის მოსწავლეებს შორის დისკუსიის გასაადვილებლად.
მოსამართლე ციცინო კიკვაძემ მოსწავლეებთან საუბარი დაიწყო საქართველოს კანონმდებლობით განსაზღვრული ქალთა უფლებების თაობაზე. მან მოსწავლეებს მიაწოდა ამომწურავი განმარტებები გენდერული ძალადობის, ქალთა მიმართ ოჯახში ძალადობის, საკუთრების უფლების, ალიმენტისა და მემკვიდრეობის საკითხებთან დაკავშირებით, და ყურადღება გაამახვილა სამოქალაქო სამართალწარმოებაზე.
გარდა ამისა, მოსამართლემ გაუზიარა რეალური მაგალითები საკუთარი საქმეებიდან და ხაზი გაუსვა ოჯახში ძალადობის საქმეებში მტკიცებულებების მიწოდებასთან დაკავშირებულ გამოწვევებს. მან აღნიშნა, რომ კონფლიქტების შემდეგ ქალები ხშირად ყოყმანობენ სასამართლოში მოძალადეების წინააღმდეგ ჩვენების მიცემაზე. გარდა ამისა, მოსამართლემ ასევე ისაუბრა ბავშვთა უფლებების კოდექსის მნიშვნელობაზე საქართველოში, რომელიც ქმნის მხარდამჭერ ჩარჩოს ბავშვებისთვის. მოსამართლემ ხაზი გაუსვა ბავშვების უფლებებს მშობლების დაშორების საქმეებში და მათ უფლებაზე, მისმენილი იქნენ სასამართლოში.
მოსამართლის მოსმენის შემდეგ მოსწავლეებმა კითხვები დასვეს. ისინი დაინტერესდნენ სხვადასხვა თემებით, მათ შორის იკითხეს, საქართველოში ოჯახში ძალადობის შემთხვევების გაზრდის ხელშემწყობი ფაქტორების შესახებ, საზოგადოების მზადყოფნაზე გენდერული ძალადობის წინააღმდეგ. ასევე მოსწავლეებს დააინტერესათ ის მიზეზები, რის გამოც ქალები ზოგჯერ თავს დაუცველად გრძნობენ და როგორ დაიცვან ქალებმა თავი, ასევე იკითხეს ბავშვების საკუთრების უფლებების თაობაზე.
