2024 წლის 11 აპრილს, თბილისის საქალაქო სასამართლოს მოსამართლე ხათუნა ჯინორია ეწვია თბილისის თანამედროვე განათლების აკადემიას და შეხვდა საშუალო სკოლის 40 მოსწავლეს. ის სტუდენტებს ესაუბრა ბავშვთა ძირითად უფლებებზე საქართველოს სამართლებრივ სისტემაში და მოსამართლეების მნიშვნელოვან როლზე ამ უფლებების დაცვაში.

შეხვედრა აკადემიის დირექტორმა დავით მალაზონიამ გახსნა. მან ისაუბრა მოსამართლეთა პროფესიის მნიშვნელობაზე და მათ როლზე კანონის უზენაესობის განმტკიცებაში.

მოსამართლე ჯინორიამ მოსწავლეებს გაუზიარა თავისი შეხედულებები მოსამართლის ყოველდღიურ საქმიანობაზე და ისაუბრა განვლილ პროფესიულ გზაზე. მან ხაზი გაუსვა იმ სირთულეებს, რომელთა გადალახვაც უწევთ მოსამართლეებს, განსაკუთრებით სენსიტიური საქმეების განხილვისას. მოსწავლეებს განსაკუთრებით აინტერესებდათ ის, თუ როგორ ხდებიან მოსამართლეები. მათ აგრეთვე დასვეს კითხვები იმ გამოწვევების შესახებ, რომლებსაც ახალგაზრდა ქალები აწყდებიან იურიდიული კარიერის არჩევისას და იმ მორალური დილემების შესახებ, რომლის წინაშეც შეიძლება აღმოჩნდნენ მოსამართლეები  კონკრეტული საქმეების გადაწყვეტისას.

ეს ღონისძიება ნაწილია USAID სამართლის უზენაესობის პროგრამის საქმიანობისა, რომელიც მიზნად ისახავს წაახალისოს მოსამართლეებსა და საშუალო სკოლის მოსწავლეებს შორის დიალოგი, ხელი შეუწყოს მოსამართლის პროფესიის შესახებ ინფორმირებულობას და გააღრმავოს ახალგაზრდა თაობის გაგება ადამიანის უფლებათა სამართლისა და პრაქტიკის შესახებ.