2024 წლის 12-14 აპრილს, USAID სამართლის უზენაესობის პროგრამამ მედიაციის შესახებ ორ პარალელურ ტრენინგს უმასპინძლა, რომელშიც მონაწილეობა მცხეთის რაიონული სასასამართლოსა და თბილისის საქალაქო სასამართლოს (რომელიც სასამართლო მედიაციაში რაოდენობრივად ყველაზე მეტ საქმეს ამისამართებს) მოსამართლეებმა და თანაშემწეებმა მიიღეს.

ტრენინგებს უძღვებოდნენ მედიაციის ექსპერტები ირაკლი ყანდაშვილი (საქართველოს მედიატორთა ასოციაციის თავმჯდომარე), ეთერ ჩაჩანიძე (პრაქტიკოსი მედიატორი, რომელსაც მოსამართლეებთან მუშაობის მრავალწლიანი გამოცდილება აქვს), სოფიო ჩაჩავა (საქართველოს მედიატორთა ასოციაციის აღმასრულებელი საბჭოს წევრი და პრაქტიკოსი მედიატორი) და ელენე ორჯონიკიძე (საქართველოს მედიატორთა ასოციაციის აღმასრულებელი საბჭოს წევრი და თბილისის საქალაქო სასამართლოს მედიაციის ცენტრის კოორდინატორი).

ტრენინგებზე, რომლებშიც 17 მოსამართლე და 32 თანაშემწე მონაწილეობდა, ყურადღება შემდეგ ძირითად საკითხებზე გამახვილდა: განსხვავება მედიაციასა და სასამართლო მორიგებას შორის; მედიაციის არსი, პრინციპები, სტადიები;  მედიაციისათვის საქმის გადაცემის კრიტერიუმები და ის ფაქტორები, რომლებიც მოსამართლეებმა და თანაშემწეებმა მედიაციაში გადასაცემი საქმეების შერჩევისას უნდა გაითვალისწინონ; მედიაციაში საქმის გადაცემის პროცესი; ინფორმაცია საქართველოს მედიატორთა ასოციაციის შესახებ, მათ შორის, როგორ ხდება მედიატორთა მომზადება და როგორ ირჩევენ მათ კონკრეტულ საქმეებზე; მედიაციის ცენტრის კოორდინატორებთან თანამშრომლობა; საინფორმაციო შეხვედრების სხვადასხვა მოდელების შესახებ მსჯელობა მოსამართლეების, კონსულტანტების, თანაშემწეებისა და მედიატორების ჩართულობით.

ამასთანავე, დუსკუსიები წარიმართა ისეთ თემებზე, როგორებიცაა: მედიაციის ვადის გაგრძელება, საქმის შეჩერება და სარჩელის უზრუნველყოფის ღონისძიებების გამოყენება. მონაწილეებმა ასევე იმსჯელეს მედიაციის შედეგად მიღწეული შეთანხმების აღსრულებასა და აღსრულებაზე უარის საფუძვლებზე.

მიუხედავად იმისა, რომ სესიების უმეტესობა პარალელურად მიმდინარებოდა ჯგუფებში (მოსამართლეებისა და თანაშემწეებისთვის ცალ-ცალკე), ყოველი დღის ბოლოს ყველა მონაწილე გაერთიანებულ სესიებს ესწრებოდა, სადაც საერთო საკითხების განხილვა და გამოცდილების გაზიარება ხდებოდა.

გაერთიანებული სესიის დროს, თბილისის საქალაქო სასამართლოს მოსამართლემ, უჩა თოდუამ საქმეთა მედიაციაში გადამისამართების შესახებ საკუთარი მიდგომა გააცნო მონაწილეებს. მან აღნიშნა, რომ სარჩელის მიღების შემდეგ განჩინებებში ხდება იმის მითითება, რომ მხარეებმა უნდა ცადონ მედიაცია. ამგვარი მიდგომა მხარეებს ავალდებულებს, რომ დაესწრონ მედიაციის პროცესს იქამდე, ვიდრე საქმეზე სასამართლო განხილვა დაიწყება, რაც ამავდროულად, გარანტიას აძლევს მათ, რომ მათი საქმის განხილვა მოხდება მოსამართლის წინაშე იმ შემთხვევაში, თუ მედიაცია წარუმატებელი აღმოჩნდება.  

ტრენერებმა ასევე ისაუბრეს მედიაციის განვითარების ბოლოდროინდელ პრაქტიკაზე, სადაც ხაზგასმით აღნიშნეს შრომითი და საოჯახო კატეგორიის დავების ავტომატური გადამისამართების ტენდენცია. მათ ხაზი გაუსვეს სასამართლო სხდომამდე მედიაციის სარგებლიანობის შესახებ სავალდებულო საინფორმაციო სესიების მნიშვნელობას.

ტრენინგის ბოლოს მონაწილეებმა მადლიერება გამოხატეს ღონისძიების ორგანიზებისათვის და აღნიშნეს, რომ ახლა მედიაციის სფეროში მიმდინარე მოვლენებზე სრულად არიან ინფორმირებულნი.