2023 წლის 18-19 თებერვალს, USAID სამართლის უზენაესობის პროგრამამ მოიწვია ბავშვისუფლებათა პრაქტიკის ჯგუფის მოსამართლე წევრები, რათა განეხილათ ბავშვის უფლებათა კოდექსის ამოქმედების შემდეგ არსებული პრაქტიკული გამოწვევები ბავშვის მშობლებისგან განცალკევების საქმეების განხილვისას, მათ შორის, საქმეთა განხილვის ვადები და გადასინჯვის მექანიზმები, ბავშვის უფლებათა კოდექსის ამოქმედების შემდეგ და კოდექსის ამოქმედებამდე სახელმწიფო ზრუნვაში გადაცემული  ბავშვების საქმეების განხილვის პრაქტიკა.

ქუთაისში გამართულ შეხვედრაზე მომხსენებლები იყვნენ: თბილისის სააპელაციო სასამართლოს მოსამართლე თამარ ონიანი (ონლაინ პრეზენტაცია) და ქუთაისის საქალაქო სასამართლოს მოსამართლე მიხეილ ბებიაშვილი. სადისკუსიო პანელებს თბილისის სააპელაციო სასამართლოს მოსამართლე შოთა გეწაძე უძღვებოდა.

მონაწილეები გაეცნენ აშშ-ს გამოცდილებას ბავშვის მშობლებისგან განცალკევების საქმეებში, USAID სამართლის უზენაესობის პროგრამის მიერ მოწვეული ამერიკელი მოსამართლე, ჯეიმს რედვაინის მიერ. 

„ეს არის საკმაოდ ტიპიური პროცესი ბავშვის ოჯახისგან განცალკევების საქმეებში ამერიკაში და ბავშვების უფლებებისა და კეთილდღეობის, აგრეთვე მშობლების უფლებების დასაცავად ეს პროცედურა არაერთ გარანტიას ითვალისწინებს სხვადასხვა დონეზე. ჩემი გამოცდილებით, უვადო განცალკევება, ანუ მშობლის უფლებების ჩამორთმევა პროცენტულად იშვიათობას წარმოადგენს საოჯახო საქმეებში. ჩვეულებრივ, ფსიქოლოგისა და სოციალური სერვისების დახმარებით, რაც მოიცავს სამედიცინო, ფსიქიკური ჯანმრთელობისა და იურიდიულ სერვისებს, შესაძლებელი ხდება ოჯახის, როგორც ურღვევი ბირთვის შენარჩუნება.” - განაცხადა მოსამართლე რედვაინმა.

მონაწილეებმა ხაზი გაუსვეს ყველა სასამართლოში ერთიანი საუკეთესო პრაქტიკის დამკვიდრების მნიშვნელობას და ბავშვის უფლებათა დაცვის მაღალი სტანდარტების აუცილებლობას, როგორც ამას მოითხოვს ბავშვის უფლებათა საერთაშორისო კონვენცია. დისკუსია იყო კიდევ ერთი წინგადადგმული ნაბიჯი ბავშვისა და მშობლის განცალკევების საქმეებში, სასამართლო პრაქტიკის გაუმჯობესების კუთხით.