2024 წლის 8 ივლისს, ბავშვის უფლებისა და ქალთა უფლებების პრაქტიკის ჯგუფების წევრი მოსამართლეები შეხვდნენ სამოქალაქო საზოგადოების ორგანიზაციებისა და იურიდიული დახმარების სამსახურის იურისტებს და განიხილეს საოჯახო დავებში მშობლის გაუცხოების, აგრეთვე ბავშვის ალიმენტის განსაზღვრასთან დაკავშირებული საკითხები.

მონაწილეებმა გამოყვეს მოსამართლის წინაშე არსებული გამოწვევები შვილისთვის გადასახდელი ალიმენტის დაანგარიშებისას. მათ შორისაა ნათლად განსაზღვრული კანონმდებლობის არარსებობა, არა-თანამცხოვრები მშობლის შემოსავლის დადგენის სირთულე და კარგად დამკვიდრებული სასამართლო პრაქტიკის ნაკლებობა ამ სფეროში. მონაწილეებმა აღნიშნეს, რომ სისტემის ხარვეზები  აზიანებს არა მხოლოდ ბავშვებს არამე ქალებსაც, რომლებთანაც ცხოვრობენ ბავშვები უმეტეს შემთხვვევაში. შესაბამისად, მათ უწევთ იმ ეკონომიკური სირთულეების გადალახვა, რაც დაკავშირებული არაადექვატური ოდენობის ალიმენტთან ან მის გადაუხდელობასთან.

მოსამართლე ეკა ზარნაძემ (თბილისის სააპელაციო სასამართლო) წარმოადგინა პრეზენტაცია შვილისთვის გადასახდელი ალიმენტის ოდენობასთან დაკავშირებით. ელენე სიჭინავამ კი წარმოადგინა ილიას სამართლის სახლის (ილიასი) მკვლევარების მიერ ჩატარებული კვლევის მიგნებები და რეკომენდაციები ალიმენტის გამოთვლის პროცესთან დაკავშირებით.

შეხვედრაზე ასევე განიხილეს მშობლის გაუცხოების პრობლემა, რაც ზოგჯერ თან ახლავს კონფლიქტურ განქორწინებას/დაშორებას. მშობლის გაუცხოებას აქვს ადგილი, როდესაც ბავშვები თავს ერთი მშობლის ან მზრუნველის მოკავშირედ აღიქვამენ და უარს ამბობენ მეორე მშობელთან ურთიერთობაზე რაიმე ლეგიტიმური საფუძვლის (როგორიცაა, უგულებელყოფა ან ძალადობა) გარეშე.

ამ საკითხზე ისაუბრა სამტრედიის რაიონული სასამართლოს მოსამართლემ, მურთაზ კაპანაძემ და ფსიქოლოგმა ეკატერინე თავართქილაძემ, რომელმაც ორი სესია მიუძღვნა განქორწინება/დაშორების პროცესში მშობლებისა და შვილების ურთერთობებსა და უშუალოდ გაუცხოებული ბავშვის მდგომარეობაზე მსჯელობას.

ბოლო სესიას მოდერირებას უწევდა უზენაესი სასამართლოს მოსამართლე ეკატერინე გასიტაშვილი. მან ხაზი გაუსვა ალიმენტ-ვალდებული მშობლის შემოსავლის დადგენის მექანიზმების გაუმჯობესების მნიშვნელობას, აგრეთვე გაუცხოების თემაზე მსჯელობის გაგრძელების საჭიროებას ბავშვების უფლებებისა და კეთილდღეობის უკეთ დასაცავად.