2024 წლის 4 აპრილს, USAID სამართლის უზენაესობის პროგრამის მხარდაჭერით, საქართველოს საერთაშორისო საარბიტრაჟო ცენტრმა (GIAC) სემინარს უმასპინძლა, რომელიც მცირე და საშუალო ბიზნეს სექტორში დავის გადაწყვეტის ალტერნატიული მექანიზმების (ADR), კერძოდ არბიტრაჟის, პოპულარიზაციას ისახავდა მიზნად.

სემინარის მთავარი ამოცანა დამსწრეთა, რომლებიც ძირითადად მცირე იურიდიული ფირმების იურისტებს წარმოადგენდნენ, დავის გადაწყვეტის საშუალებების, კერძოდ კი, არბიტრაჟის უპირატესობების შესახებ ინფორმირება და მათი წახალისება იყო, რომ მეტი საქმის გადამისამართება მოხდეს არბიტრაჟში. ღონისძიებას ორმოცდაექვსი იურიდიული პროფესიის წარმომადგენელი ესწრებოდა.

სემინარი GIAC-ის მდივნის, ბექა ინჯიას და USAID სამართლის უზენაესობის პროგრამის  ხელმძღვანელის, გიორგი ჩხეიძის მისალმებებით დაიწყო. ბატონმა ჩხეიძემ ხაზი გაუსვა ADR მექანიზმების მნიშვნელობას და განსაკუთრებით აღნიშნა, თუ რამდენად ეფექტურია ეს მექანიზმები დავების გადაწყვეტისთვის.

საინფორმციო სესიებს სფეროს ექსპერტები უძღვებოდნენ. პირველი სესიის დროს, ბა-ნმა ინჯიამ და ირაკლი კორძახიამ, Grata International-ის პარტნიორმა, დავის გადაწყვეტის შესაფერისი მექანიზმის არჩევის მნიშვნელობაზე ისაუბრეს და მონაწილეებს საარბიტრაჟო შეთანხმებების შედგენასთან დაკავშირებული რჩევები გაუზიარეს. ამის შემდეგ, რუსუდან ჭკუასელმა, საქართველოს არბიტრთა ასოციაციის თავმჯდომარემ არბიტრთა შერჩევის კრიტერიუმები განმარტა. და ბოლოს, დავით ედილაშვილმა, GIAC-ის უფროსმა იურისტმა, აუდიტორიას საარბიტრაჟო პროცესის სხვადასხვა ეტაპები გააცნო.

სემინარი ინტერაქტიული იყო, სადაც დისკუსია საკითხთა ფართო სპექტრს მოიცავდა. მონაწილეებმა ინფორმაცია მიიღეს არბიტრაჟის პროცედურულ საკითხებსა და  არბიტრაჟთან დაკავშირებულ ხარჯებზე.