2023 წლის 11 ნოემბერს, საქართველოს მედიატორთა ასოციაციამ, USAID სამართლის უზენაესობის პროგრამის მხარდაჭერით, მედიატორებს შორის გამოცდილების გაზიარების რიგით მეხუთე შეხვედრას უმასპინძლა. მასში თბილისისა და ბათუმის წარმომადგენელი 16 მედიატორი მონაწილეობდა.  

შეხვედრას მოდერირებას უწევდნენ თამარ იმნაიშვილი, საქართველოს მედიატორთა ასოციაციის აღმასრულებელი დირექტორი და ირაკლი ადეიშვილი, საქართველოს მედიატორთა ასოციაციის ეთიკის კომისიის წევრი, სადაც გამოცდილმა მედიატორებმა ასოციაციის ახალ წევრებს პრაქტიკული გამოცდილება გაუზიარეს. შეხვედრაზე შემდეგი საკითხები განიხილეს: მედიაციის პროცესში მხარეთა ჩართულობასთან დაკავშირებული გამოწვევები; ადვოკატის როლი და გავლენა მედიაციის პროცესზე; მედიაციის პროცესის მხარეებთან სწორი კომუნიკაციის მნიშვნელობა; სავალდებულო სესიების ჩატარების საკითხი სასამართლო მედიაციის დროს; მხარის გამოუცხადებლობა მედიაციის სესიაზე; არასრულწლოვნების საქმეებში ფსიქოლოგის ჩართულობის საკითხი  - მედიატორის დისკრეცია; მედიატორის მიუკერძოებლობისა და დამოუკიდებლობის საკითხი; და კომერციული მედიაცია.

მონაწილეებმა ერთმანეთს გაუზიარეს გამოცდილება იმ სამედიაციო საქმეებთან დაკავშირებით, რომლებიც მათ პრაქტიკაში გამოწვევებთან იყო დაკავშირებული. მათ კოლეგებისგან მიიღეს რჩევები იმის შესახებ, თუ როგორ შეიძლება ამ გამოწვევებთან გამკლავება და მათი გადაჭრა, რაც მსგავსი სიტუაციების დროს უფრო ეფექტურად მოქმედების სტრატეგიების გაზიარების გზით განხორციელდა. მონაწილეებმა ერთანეთს ასევე გაუზიარეს წარმატების მაგალითები საკუთარი პრაქტიკიდან. შეხვედრა მედიატორებს საუკეთესო პრაქტიკისა და მედიაციის სფეროში არსებული პროცესების შესახებ უახლესი ინფორმაციის მიღებაში დაეხმარათ.

საქართველოს მედიატორთა ასოციაცია მსგავს შეხვედრებს რეგულარულად მართავს, რაც ხელს უწყობს მედიატორებს შორის ერთიანობის განმტკიცებას. კოლეგებთან ურთიერთობა და ახალი კავშირების დამყარება ისეთ მხარდამჭერ ქსელს ქმნის, სადაც მედიატორებს კოლეგებისგან რჩევებისა და სხვა სახის დახმარების მიღება შეუძლიათ.