2023 წლის 27 ივნისს, USAID სამართლის უზენაესობის პროგრამამ სამუშაო შეხვედრა გამართა საქართველოს იურიდიული დახმარების მიმწოდებელთა ქსელისთვის. შეხვედრის მიზანი იყო მხარი დაეჭირა ქსელის აღორძინებისათვის, რომლის ფუნქციონირებაზე ნაწილობრივ კოვიდ პანდემიამ იქონია გავლენა. ქსელის მთავარი მიზანია ხელი შეუწყოს წევრ ორგანიზაციებს შორის თანამშრომლობას და საქმეების რეფერირებას, რაც საბოლოოდ უზრუნველყოფს მართლმსაჯულებაზე უკეთესი ხელმისაწვდომობას მოსახლეობისთვის.

მისასალმებელი სიტყვით მონაწილეებს მიმართეს იურიდიული დახმარების სამსახურის დირექტორმა, დავით სიმონიამ, USAID სამართლის უზენაესობის პროგრამის ხელმძღვანელმა გიორგი ჩხეიძემ, და გაეროს განვითარების პროგრამის კანონის უზენაესობისა და მართლმსაჯულებაზე ხელმისაწვდომობის პროექტის მენეჯერმა ლევან ასათიანმა. USAID სამართლის უზენაესობის და გაეროს განვითარების პროგრამის წარმომადგენლებმა მზადყოფნა გამოთქვეს მხარი დაუჭირონ ქსელს მომავალ ინიციატივებსა და აქტივობებში.

,,იურიდიული დახმარების მიმწოდებელთა ქსელი აქტიურად შეუწყობს ხელს მართლმსაჯულების ხელმისაწვდომობის ზრდას, რაც უზრუნველყოფს თითოეული მოქალაქის თანაბარ შესაძლებლობასა და წვდომას უფასო იურიდიული დახმარების სერვისებზე’’ – თქვა დავით სიმონიამ.

შეხვედრას ესწრებოდნენ ქსელის დამფუძნებელი და პოტენციური წევრი ორგანიზაციები, მათ შორის სამოქალაქო საზოგადოების, სხვადასხვა საუნივერსიტეტო იურიდიული კლინიკისა და საქართველოს მედიატორთა ასოციაციის წარმომადგენლები. მონაწილეებმა ხაზი გაუსვეს ქსელის განახლების მნიშვნელობას, იურიდიული დახმარების გამწევ ორგანიზაციებს შორის ეფექტური გადამისამართების სისტემის ჩამოყალიბებას მათ მანდატებსა და შესაძლებლობებზე დაყრდნობით და თანამშრომლობის სულისკვეთების გაძლიერებას.

მარიამ გაბედავამ, USAID სამართლის უზენაესობის პროგრამის იურიდიული დახმარების მრჩეველმა, ხაზი გაუსვა თანამშრომლობის მნიშვნელობას იურიდიული კონსულტაციების საერთო მიდგომებისა და სახელმძღვანელო პრინციპების ჩამოყალიბებაში, რაც უზრუნველყოფს მაღალი ხარისხისა და ეფექტურობის უზრუნველყოფას სერვისის ყველა მიმწოდებელთან.

საწყის ეტაპზე ქსელის საქმიანობა ფოკუსირებული იქნება ქსელის არსებული დებულების გადახედვაზე/გადამუშავებაზე, რათა ხელი შეეწყოს მის განახლებას და ფუნქციონირებას. პროგრამა გააგრძელებს იურიდიული დახმარების სამსახურისა და სამოქალაქო საზოგადოების ორგანიზაციების მუდმივ მხარდაჭერას იურიდიული დახმარების მიმწოდებელთა ქსელის აღორძინებისა და გაძლიერების მიზნით.