USAID სამართლის უზენაესობის პროგრამა მუშაობს მართლმსაჯულებაზე ხელმისაწვდომობის გაძლიერებაზე ყველა ადამიანისთვის საქართველოში. პროგრამა უზრუნველყოფს იურიდიული დახმარების სამსახურისთვის მუდმივ მხარდაჭერას, მათ შორის საერთაშორისო ექსპერტების მოწვევითა და რიგი ტექნიკური დახმარების გაწევით.

ინგრიდ ჰესი, საერთაშორისო სამართლებრივი ფონდის მეორე მენტორი, საქმიანობას ახალციხეში 2023 წლის ოქტომბერში შეუდგა. ინგრიდ ჰესი ფონდის პირველი მენტორის, ქეით კონიერსის მსგავსად იმუშავებს იურიდიული დახმარების სამსახურთან. ქეით კონიერსი  საქართველოში გაზაფხულის პერიოდში იმყოფებოდა და სამი თვის განმავლობაში მუშაობდა სამსახურის ქუთაისის ბიუროში და დასავლეთ საქართველოში.

ინგრიდ ჰესი სამ თვეს დაჰყოფს ახალციხეში და იმუშავებს იურიდიული დახმარების სამსახურის ახალციხის ბიუროსთან. იგი მენტორობას გაუწევს და გაუზიარებს მის მრავალწლიან გამოცდილებას სამსახურის იურისტებს. ახალციხეში გამგზავრებამდე, 4 ოქტომბერს იგი შეხვდა იურიდიული დახმარების სამსახურის დირექტორს, დავით სიმონიას და დირექტორის მოადგილეს, მიხეილ ხურციძეს სამომავლო თანამშრომლობის მოლოდინების განსახილველად.

9 ოქტომბერს, ინგრიდ ჰესი, საქართველოში ფონდის პროგრამის დირექტორ ალან დალთან ერთად შეხვდა ამერიკელ მოსამართლე თიმ ბალანდს, რომელიც სამოსამართლეო გამოცდილების გაზიარების მისიით სამცხე-ჯავახეთის რეგიონში ახალციხეში იმყოფებოდა. შეხვედრისას, მოსამართლე ბალანდმა გამოცდილებაზე დაყრდნობით მისი დაკვირვებები გაუზიარა. იმავე დღეს, ინგრიდ ჰესი და ალან დალი ეწვივნენ სამსახურის ახალციხის ბიუროს და ბიუროს უფროსს დავით ზარიძეს და იურისტებს შეხვდნენ. ვიზიტით ხაზი გაესვა ერთობლივი ნაყოფიერი თანამშრომლობისთვის მათ მზაობას.  

„ჩემთვის დიდი პატივია ახალციხის იურიდიული დახმარების ბიუროში იურისტებთან სამუშაოდ მიწვევა. ვიმედოვნებ, რომ ჩემი მრავალწლიანი გამოცდილებით შემიძლია მხარი დავუჭირო იურისტებს და ინფორმაციის გაცვლა საბოლოო ჯამში სარგებელს მოუტანს იურიდიული დახმარების სერვისით მოსარგებლე ადამიანებს“ – ამბობს ინგრიდ ჰესი.

ინგრიდ ჰესს 25 წელზე მეტი ხნის გამოცდილება აქვს სისხლის სამართლის, სამოქალაქო და ადმინისტრაციული საქმეების მხრივ. მისი მრავალფეროვანი გამოცდილება მოიცავს სამოქალაქო სამართალს, ბავშვთა დაცვის საკითხებს, კანადის მკვიდრი მოსახლეობისთვის რეპარაციის მიღების და ადამიანის უფლებების კუთხით საჩივრებს.