უცხოური ინვესტიციებისა და საერთაშორისო გარიგებების რაოდენობის ზრდასთან ერთად, იზრდება საერთაშორისო დავებში გამოცდილი იურისტების საჭიროება. ქართველმა სტუდენტებმა და იურისტებმა საერთაშორისო კარიერის კუთხით დიდი ინტერესი გამოავლინეს და შესაბამისად, სფეროში წარმატებული პრაქტიკოსების მხრიდან ინფორმაციისა და გამოცდილების გაზიარების სერიოზული საჭიროება არსებობს.

2023 წლის 23 მარტს, USAID სამართლის უზენაესობის პროგრამის მხარდაჭერით, საქართველოს არბიტრთა ასოციაციამ, არბიტრაჟში ქალების როლის გაზრდაზე მომუშავე საერთაშორისო ორგანიზაცია ArbitralWomen-თან ერთად საერთაშორისო ფორუმს უმასპინძლა.

კარიერა და მრავალფეროვნება არბიტრაჟში - საერთაშორისო ფორუმის ფარგლებში, გლობალური დავების მოგვარებაში გამოცდილების მქონე წამყვანმა ქალმა იურისტებმა და ArbitralWomen-ის საბჭოს წევრებმა საკუთარი გამოცდილება გაუზიარეს დამსწრე საზოგადოებას. პანელური დისკუსიის ფორმატში, გამომსვლელებმა ისაუბრეს იმ გამოწვევებსა და შესაძლებლობებზე, რაც საერთაშორისო არბიტრაჟში წარმატების მიღწევას უკავშირდება.

დაახლოებით ორმოცდაათმა მონაწილემ მიიღო ინფორმაცია საერთაშორისო კომერციული არბიტრაჟის სფეროში პროფესიული კარიერის განვითარების შესახებ, ასევე დავების მოგვარების მიმართულებით საქართველოსა და მსოფლიოში გენდერული თანასწორობისა და მრავალფეროვნების უზრუნველყოფის კუთხით არსებულ ტენდენციებზე.

„მრავალფეროვნება და ინკლუზიურობა, ნებისმიერ პროფესიულ წამოწყებაში, წარმატების საწინდარია. ბოლო ათწლეულების განმავლობაში, გლობალური იურიდიული საზოგადოების ძალისხმევით, არბიტრაჟში     მრავალფეროვნების აუცილებლობა აქტიური განხილვის თემაა, თუმცა, სასურველ შედეგამდე კვლავ დიდი გზაა გასავლელი. მარტი ქალთა ისტორიის თვეა. სწორედ ამიტომ, გადავწყვიტეთ ArbitralWomen-თან ერთად, ჩავატაროთ პირველი საერთაშორისო ფორუმი საქართველოში.“ - განაცხადა მისალმებისას ჯაბა გველებიანმა, საქართველოს არბიტრთა ასოციაციის თავმჯდომარემ. 

USAID სამართლის უზენაესობის პროგრამის მრჩეველმა ADR-ის საკითხებში, სოფო ტყემალაძემ ხაზი გაუსვა საზოგადოებაში არბიტრაჟის შესახებ ცნობიერების ამაღლების მნიშვნელობას და იურისტების წახალისებას, რომ ამ სფეროში ისინი (და განსაკუთრებით, ქალები, რომლებიც დამატებითი გამოწვევების წინაშე შესაძლოა აღმოჩნდნენ) უფრო აქტიურად ჩაერთონ. „საერთაშორისო კომერციული დავების გადაწყვეტის უპირატესი მეთოდი არბიტრაჟია. ჩვენ უნდა გავაძლიეროთ ამ სფეროში იურისტების შესაძლებლობები, ასევე დავეხმაროთ და მივაწოდოთ ინფორმაცია იმ იურისტებს, რომლებსაც სურვილი აქვთ ჩაერთო საერთაშორისო არბიტრაჟში, არსებულ მიდგომებზე, უნარებსა და ქმედებებზე“, განაცხადა მან.

ფორუმის სპიკერები იყვნენ მრინალინი სინხი - დირექტორი, Plesner (შვედეთი/სინგაპური); რუსა გერგაული, პარტნიორი, Fortior Law (საქართველო/შვეიცარია); ოზგეჯან კორკმაზი - უფროსი იურისტი, Kabine Law Office (თურქეთი); ალისია ზიელინსკა - მრჩეველი, Queritius (გერმანია); ნატა ღიბრაძე, მრჩეველი, Hogan Lovells (გერმანია/საქართველო); და რუსა ჭკუასელი - პარტნიორი, BLC (საქართველო).