USAID სამართლის უზენაესობის პროგრამა მხარს უჭერს ადგილობრივი მოსახლეობის ცნობიერების ამაღლებას სასამართლოს ხელმისაწვდომობის შესახებ.

2023 წლის 19 ივნისს, პრევენცია პროგრესისთვის (PFP) და სამოქალაქო ჩართულობისა და აქტივიზმის ცენტრმა (CEAC) მარნეულის თემის თვრამეტ წარმომადგენელთან და ორ სამოქალაქო აქტივისტთან სასამართლოს ხელმისაწვდომობის შესახებ შეხვედრა გამართეს.

PFP-ისა და CEAC-ის ექსპერტებმა და მოხალისეებმა მოქალაქეებს მიაწოდეს ინფორმაცია მათი უფლებების, სარჩელის ფორმების, უფასო იურიდიული დახმარებისა და იმ გამოწვევების შესახებ, რომლებსაც მოქალაქეები შეიძლება აწყდებოდნენ სასამართლოსთვის მიმართვისას.

მონაწილეთა მიერ გამოვლენილ პრობლემებს შორის იყო თარჯიმნების არაკომპეტენტურობა, ქალთა მიმართ ძალადობის საქმეებზე სასჯელების  არაპროპორციულობა და უფასო იურიდიული დახმარების საჭიროება. დამსწრეთა აზრით,   სასამართლო სისტემაში არსებობს ინფორმაციის კონფინდენციალურობის დაცვის პრობლემაც. 

შეხვედრის მიმდინარეობისას მონაწილეებს დაურიგდათ გზამკვლევი ქართულ და აზერბაიჯანულ ენებზე, რომელიც აერთიანებს მოკლე ინფორმაციას სასამართლოსთან დაკავშირებულ  საკითხებზე. შეხვედრა ქართულ და აზერბაიჯანულ ენებზე მომუშავე ადგილობრივმა მედიებმა, რადიო მარნეულმა და interpress.ge-მ გააშუქეს.

მედიასთან კომუნიკაციისას CEAC-ის წარმომადგენელმა, რაშან ზიადალიევმა აღნიშნა: “ამ შეხვედრის ფარგლებში მოსახლეობას მივაწოდეთ ინფორმაცია, თუ როგორ მუშაობს სასამართლო სისტემა, რა პროცესების გავლაა საჭირო სასამართლოში პროცესის დაწყებისთვის და რა პროცესები მიმდინარეობს სასამართლოში მთელი საქართველოს მასშტაბით. ასევე, ვისაუბრეთ თუ რამდენად ხელმისაწვდომია სასამართლო  მოქალაქეებისთვის". 

პროექტის ფარგლებში, მართლმსაჯულების ხელმისაწვდომობისა და სამართლიანი სასამართლოს მნიშვნელობის შესახებ საქართველოში მცხოვრებ ეთნიკურ უმცირესობების ცნობიერების ამაღლების მიზნით, კიდევ შვიდი შეხვედრა გაიმართება როგორც რეგიონულ ცენტრებში, ასევე მარნეულისა და ბოლნისის მუნიციპალიტეტების სოფლებში.