USAID სამართლის უზენაესობის პროგრამა, საქართველოს მედიატორთა ასოციაციასთან თანამშრომლობით, იწყებს მედიაციისა და მისი უპირატესობების გაცნობას ფართო საზოგადოებისთვის.

2023 წლის 17 თებერვალს, საქართველოს მედიატორთა ასოციაციამ ცნობიერების ამაღლების კამპანია რუსთავიდან დაიწყო.

ღონისძიებას, რომელიც დემოკრატიული ჩართულობის ცენტრების ქსელის რუსთავის ოფისში გაიმართა, მასწავლებლები, ადვოკატები, ადგილობრივი სამოქალაქო საზოგადოების ორგანიზაციებისა და აკადემიური წრეების წარმომადგენლები ესწრებოდნენ.

დისკუსიას ირაკლი ყანდაშვილი, საქართველოს მედიატორთა ასოციაციის თავმჯდომარე, სოფო ტყემალაძე, USAID სამართლის უზენაესობის პროგრამის ADR მრჩეველი და  ლიანა ჩარკვიანი, რუსთავში მოღვაწე მედიატორი უძღვებოდნენ. ოცდაათმა ადგილობრივმა და მედიაციით პოტენციურმა მოსარგებლემ მოისმინა იმის შესახებ, თუ რას წარმოადგენს მედიაცია, რა დადებითი მხარეები გააჩნია მას, რა ტიპის დავებისათვის გამოიყენება იგი, რა სახის ხარჯები უკავშირდება მედიაციის პროცესს და როგორ უნდა მოხდეს მედიატორის ჩართულობა. შეხვედრისას მოხდა მედიაციით გზით განხორციელებული საქმეების კონკრეტული მაგალითების გაზიარება, ასევე განიხილეს, თუ რა დატვირთვით მუშაობენ სასამართლო მედიაციის ცენტრები და როგორია მორიგების სტატისტიკა.  

დამსწრე საზოგადოებამ დადებითად შეაფასა დავის მოგვარების ეს საშუალება. შეხვედრის მონაწილეები განსაკუთრებით დაინტერესდნენ, რამდენად ხელმისაწვდომია ადგილობრივი მედიატორები საქართველოს სხვადასხვა კუთხეში, ვინ არიან ისინი და როგორ შეიძლება გახდე მედიატორი. ადგილობრივი სამოქალაქო საზოგადოების ორგანიზაციების წარმომადგენლებმა საკუთარ ბენეფიციარებთან მსგავსი შეხვედრების გამართვის ინტერესი გამოხატეს. შემდეგი ასეთი შეხვედრა ქუთაისში 2023 წლის მარტში გაიმართება.