საქართველოს ახალგაზრდა იურისტთა ასოციაციამ (საია) USAID სამართლის უზენაესობის პროგრამის მხარდაჭერით და საქართველოს ყრუთა კავშირთან თანამშრომლობით ზუგდიდსა და თბილისში ცნობიერების ამაღლების ორი შეხვედრა გამართა სმენისა და მეტყველების დარღვევის მქონე პირებთან.

საინფორმაციო შეხვედრები 10 ნოემბერს ზუგდიდში, 18 ნოემბერს კი თბილისში გაიმართა. საია-ს ადვოკატების ხელმძღვანელობით გამართულ შეხვედრებს ჯამში 31 ადამიანი ესწრებოდა.

საია-ს იურისტებმა შეხვედრის მონაწილეებს გააცნეს მათი საპროცესო უფლებები და კანონმდებლობიდან გამომდინარე სამართალდამცავი ორგანოების ვალდებულებები. კერძოდ, მათ განიხილეს მისაწვდომობის პრინციპი და შშმ პირებთან კომუნიკაციის ფორმები, რომელიც უნდა იყოს უზრუნველყოფილი პოლიციის მიერ საგამოძიებო და საპროცესო ღონისძიებების განხორციელებისას. შეხვედრები ინტერაქტიული იყო და მონაწილეებმა მათ უფლებებთან დაკავშირებით არაერთი კითხვა დასვეს.

აღნიშნული შეხვედრები გაიმართა USAID სამართლის უზენაესობის პროგრამის მიერ მხარდაჭერილი პროექტის - სტრატეგიული სამართალწარმოება მოწყვლადი ჯგუფებისთვის - ფარგლებში.