2024 წლის 20 აპრილს, USAID სამართლის უზენაესობის პროგრამის მხარდაჭერით, საქართველოს მედიატორთა ასოციაციამ კაჭრეთში შეხვედრა გამართა, რომელსაც აღმოსავლეთ საქართველოს სასამართლო მედიაციის ახლადგახსნილი ცენტრების ათი წარმომადგენელი დაესწრო. მონაწილეები მცხეთის, ახალციხის, თელავის, გურჯაანის, ბოლნისის, თეთრიწყაროს რაიონულ სასამართლოების, ასევე დედოფლისწყაროსა და საგარეჯოს მაგისტრატი სასამართლოების მენეჯერები და სასამართლო აპარატის თანამშრომლები იყვნენ.

შეხვედრის მიზანს სამედიაციო საქმეთა გადაცემა/რეფერირების დროს არსებული პრაქტიკისა და გამოწვევების ანალიზი, აგრეთვე სამედიაციო საქმეთა სტატისტიკური მონაცემების დამუშავების წესისა და სტანდარტის შემოღება წარმოადგენდა. განხილვის ერთ-ერთი მნიშვნელოვანი თემა მედიაციის პროცესში ადვოკატების როლი იყო.

ეკა ხატიაშვილმა, დედოფლისწყაროსა და საგარეჯოს მაგისტრატი სასამართლოების მენეჯერმა მაგალითები მოიყვანა იმის საილუსტრაციოდ, თუ როგორ შეუძლია ადვოკატის ქმედებებს მედიაციის პროცესის შეფერხება, რითაც ხაზი გაუსვა მედიაციის შესახებ ადვოკატთა ცნობიერების ამაღლების აუცილებლობას.

მონაწილეები შეთანხმდნენ, რომ აუცილებელია მედიაციის საქმეების სტატისტიკური მონაცემების დამუშავებასთან დაკავშირებული სამართალწარმოებისთვის სტანდარტიზებული დოკუმენტაციის შემუშავება მოხდეს. ასევე აღინიშნა, რომ მნიშვნელოვანია დაიგეგმოს შეხვედრა, სადაც სასამართლოს წარმომადგენლები გამოთქვამენ მოსაზრებებს აღნიშნული დოკუმენტების შესახებ. პროცესში ჩართული იქნება ექსპერტიც, რომელიც დოკუმენტაციის სამართლებრივ სტანდარტებთან შესაბამისობას უზრუნველყოფს. შედეგად მიღებული სტანდარტული დოკუმენტაცია ყველა სასამართლო ცენტრს გაეგზავნება და ისინი იკისრებენ ვალდებულებას, რომ ამ დოკუმენტებს მათ რეესტრში რეგისტრირებულ მედიატორებს გაუზიარებენ.  გარდა ამისა, მონაწილეებმა ხაზი გაუსვეს სასამართლო მედიაციის ცენტრებში კადრების დეფიციტს, რაც გავლენას ახდენს მიმდინარე პრაქტიკაზე.

შეხვედრაზე, რომელიც დისკუსიის ფორმატში ჩატარდა, ყველა სასამართლო ცენტრის წარმომადგენელმა სამომავლო ერთიანი თანამრომლობის მზაობა გამოთქვა, რაც მიზნად ისახავს სტატისტიკური მონაცემების დამუშავების ერთიანი მოდელის შემუშავებას, რომელიც შესაბამისობაში იქნება დადგენილ სტანდარტებთან.