17-18 დეკემბერს, USAID სამართლის უზენაესობის პროგრამის მხარდაჭერით ბორჯომში ორდღიანი სამუშაო შეხვედრა გაიმართა, რომელშიც საქართველოს საკონსტიტუციო სასამართლოს მოსამართლეები, იურისტები და საერთო სასამართლოების მოსამართლეები მონაწილეობდნენ, რომელთაც საკონსტიტუციო სასამართლოში საერთო სასამართლოების წარდგინებათა განხილვის არსებული პრაქტიკა და გამოწვევები განიხილეს.

შეხვედრის მთავარი მიზანი იყო საკონსტიტუციო სასამართლოს მოსამართლეებს საერთო სასამართლოების მოსამართლეებისათვის გაეზიარებინათ თავიანთი ცოდნა და ექსპერტიზა. 

დისკუსიები გაიმართა რამდენიმე მნიშვნელოვანი სამართლებრივი და პრაქტიკული საკითხის გარშემო, მათ შორის: (1) როგორია საერთო სასამართლოების მოსამართლეების სპეციფიური როლი საკონსტიტუციო სამართალწარმოებაში; (2) როგორ უნდა განაწილდეს უფლებამოსილება საერთო სასამართლოებისა და საკონსტიტუციო სასამრთლოს მოსამართლეებს შორის, როდესაც საკითხი ეხება კონსტიტუციის განმარტებას, მათ შორის, როდის უნდა გამოიყენოს საერთო სასამართლოების მოსამართლემ კონსტიტუციის ნორმა პირდაპირ, ან განმარტოს კონსტიტუცია საკონსტიტუციო სასამართლოს მიერ უკვე დადგენილი კონსტიტუციური სტანდარტების შესაბამისად და როდის უნდა მიმართოს საკონსტიტუციო სასამართლოს წარდგინებით; (3) საკონსტიტუციო სასამართლოსათვის წარდგინებით მიმართვა არის მოსამართლის უფლებამოსილება თუ ვალდებულება, როდესაც კანონის ნორმას აქვს კონსტიტუციასთან შესაბამისობის აშკარა პრობლემა; და (4) შეუძლია თუ არა საკონსტიტუციო სასამართლოს განმცხადებელს მოსთხოვოს საერთო სასამართლოების ყველა ინსტანციის ამოწურვა, ვიდრე ნორმის კონსტიტუციურობა საკონსტიტუციო სასამართლოში იქნება გასაჩივრებული.

შეხვედრის მონაწილეებს საკონსტიტუციო სასამართლოს მოსამართლემ, თეიმურაზ ტუღუშმა სპეციალური სესიის ფარგლებში პრაქტიკული რჩევებიც გაუზიარა, თუ როდის და როგორ უნდა მიმართოს მოსამართლემ საკონსტიტუციო სასამართლოს შესაბამისი წარდგინებით.