USAID სამართლის უზენაესობის პროგრამა მხარს უჭერს საჯარო დისკუსიებს სასამართლო სისტემასთან დაკავშირებულ თემებზე საქართველოს რეგიონებში. 2023 წლის 19 მაისს, დემოკრატიული ინსტიტუტების კვლევის ცენტრმა (DIRC) სამცხე-ჯავახეთში, სტუდენტებთან და ადგილობრივ სამოქალაქო საზოგადოების ორგანიზაციებთან გამართა შეხვედრები. შეხვედრების მონაწილეებმა განიხილეს, თუ რა გავლენას ახდენს სასამართლო რიგითი მოქალაქის ცხოვრებაზე.

სტუდენტებთან შეხვედრისას სამცხე-ჯავახეთის სახელმწიფო უნივერსიტეტში DIRC-ის წარმომადგენლებმა სოფო ვერძეულმა, ნინა ჩიხლაძემ და ბიკო ქართველიშვილმა ისაუბრეს მართლმსაჯულების სისტემის მნიშვნელობის, გამოწვევებისა და მიმდინარე რეფორმების შესახებ. კერძოდ, განიხილეს სისტემის მდგომარეობა ევროკავშირის კანდიდატი ქვეყნის სტატუსის მისაღებად შესასრულებელ 12 რეკომენდაციასთან მიმართებით. სტუდენტები დაინტერესდნენ იმით, თუ როგორ განხორციელდა მოსამართლეების შეფასება სხვა ქვეყნებში. შეხვედრაზე ასევე განიხილეს ისეთი თემები, როგორიცაა მოსამართლეების დანიშვნა და იუსტიციის უმაღლესი საბჭოს არამოსამართლე წევრების არჩევა.

მედიისა და ადგილობრივი ორგანიზაციების  წარმომადგენლებთან შეხვედრა ახალციხის დემოკრატიული ჩართულობის ცენტრში  გაიმართა. DIRC-ის წარმომადგენლებმა დამსწრეებს სასამართლო რეფორმის პრაქტიკულ ასპექტებზე მიაწოდეს ინფორმაცია. მონაწილეებმა ისაუბრეს ადგილობრივ გამოწვევებზე, მათ შორის ენობრივ ბარიერებსა და სოციალურ-ეკონომიკურ ფაქტორებზე, რომლებიც გავლენას ახდენს მართლმსაჯულების ხელმისაწვდომობაზე.

რეგიონული შეხვედრები DIRC-ის პროექტის ნაწილია, რომელიც USAID სამართლის უზენაესობის პროგრამის მიერ არის დაფინანსებული. პროექტის მიზანია საზოგადოების ცნობიერების ამაღლება მართლმსაჯულების სექტორში მიმდინარე მოვლენებთან და ამ მიმართულებით საქართველოს საერთაშორისო ვალდებულებებთან დაკავშირებით.