USAID სამართლის უზენაესობის პროგრამა მუშაობს, რათა მოხდეს სასამართლო მედიაციის უფრო ფართოდ გამოყენება და მედიაციის შესახებ ადვოკატების ცნობიერების ამაღლება.

ამ მიზნით, პროგრამამ, საქართველოს მედიატორთა ასოციაციასა და საქართველოს ადვოკატთა ასოციაციასთან თანამშრომლობით, მედიაციის შესახებ საუბრების ციკლი წამოიწყო. საუბრებისას იმ ადვოკატების მიერ, ვისაც მედიაციაში კლიენტის წარმომადგენლობის გამოცდილება გააჩნიათ, ხდება კოლეგებისთვის, რომლებსაც ჯერ არ მიმართულებით არ უმუშავიათ, აღნიშნულ საკითებზე გამოცდილების გაზიარება.   

2023 წლის 16 თებერვალს, პირველი ამ ტიპის შეხვედრა გაიმართა, რომელზეც პროგრამამ საქართველოს ადვოკატთა ასოციაციის წევრი თბილისში მოღვაწე ოცი ადვოკატი მოიწვია.

საქართველოს მედიატორთა ასოციაციასთან კოორდინაციით, პროგრამამ გამოცდილების გაზიარების მიზნით, ადვოკატები ირაკლი კორძახია და თეა ჭეიშვილი მოიწვია, რომლებიც რამდენიმე წელია, რაც მედიატორობას ეწევიან. შეხვედრაზე განხილული იქნა შემდეგი საკითხები: პროცესის მიმდინარეობისას როდის ურჩევენ ადვოკატები კლიენტებს მედიაციას? როგორ ურჩევენ მედიაციას და როგორ უმკლავდებიან იმ გამოწვევებს, რაც მედიაციის სასარგებლოდ არჩევანის გაკეთებისას ადვოკატის „სისუსტის“ აღქმას უკავშირდება? როგორ გეგმავენ და უთანხმებენ კლიენტს მომსახურების საფასურს მედიაციაში წარმომადგენლობის შემთხვევებისთვის? რა სხვა სარგებელს იღებს კლიენტი დავის მედიაციით გადაწყვეტისას? როგორ უნდა იქნას შედგენილი მედიაციის ან დავის გადაწყვეტის მრავალსაფეხურიანი (მედიაცია-არბიტრაჟის) მუხლი?

„ადვოკატები გადამწყვეტ როლს თამაშობენ მედიაციის ხელშეწყობის საქმეში, რადგან კლიენტები მათ ენდობიან და ისინი გაითვალისწინებენ რჩევას, გააკეთონ თუ არა არჩევანი მედიაციის სასარგებლოდ. ადვოკატების მომზადება და მათი აღქმა მედიაციის შესახებ ასევე ზეგავლენას ახდენს იმაზე, თუ როგორი ეფექტიანი ან უსარგებლო იქნება მათი ამ პროცესში ჩართულობა. საუკეთესო გზა იმისთვის, რომ ადვოკატებმა შეიტყონ ამ პროცესის შესახებ და ნდობა გაუჩნდეთ მის მიმართ, არის იმ კოლეგებთან საუბარი, რომლებმაც უკვე ცადეს მედიაცია და ხშირად იყენებენ მას“ - განაცხადა მისალმებისას სოფო ტყემალაძემ, USAID სამართლის უზენაესობის პროგრამის ADR მრჩეველმა.

„აუცილებელია, რომ ადვოკატებს სრულყოფილად ესმოდეთ მედიაციის პროცესი, რათა მათ კლიენტებს სწორი ინფორმაცია მიაწოდონ მის შესახებ და საჭიროების შემთხვევაში, ეფექტიანი წარმომადგენლობა განახორციელონ ამ პროცესში. ეს შეხვედრები ქმნის უსაფრთხო გარემოს, სადაც ადვოკატებს შეუძლიათ თავისუფლად დასვან შეკითხვები, მოახდინონ თავიანთი მოლოდინებისა და/ან პროცესის მიმართ სკეპტიციზმის გაზიარება, და მოუსმინონ იმ ადვოკატებს, რომლებსაც აქვთ მედიაციაში საქმეთა გადაცემისა და კლიენტების წარმომადგენლობის გამოცდილება.” – განაცხადა საქართველოს მედიატორთა ასოციაციის თავმჯდომარემ, ირაკლი ყანდაშვილმა.

პროგრამა მსგავსი შეხვედრების გამართვას თბილისში, გორში, მცხეთაში, ქუთაისში, ბათუმსა და თელავში გეგმავს.