USAID სამართლის უზენაესობის პროგრამა განაგრძობს მედიაციაზე საუბრების ჩატარებას, რათა მოხდეს სასამართლო მედიაციის უფრო ფართოდ გამოყენება და მედიაციის შესახებ ადვოკატების ცნობიერების ამაღლება.

2023 წლის 14 სექტემბერს, პროგრამამ და მისმა პარტნიორებმა, საქართველოს მედიატორთა ასოციაციამ და საქართველოს ადვოკატთა ასოციაციამ თბილისში მოღვაწე 14 ადვოკატს „მედიაციაზე საუბრების“ რიგით მესამე შეხვედრაზე უმასპინძლეს. 

საუბრები მედიაციაზე წარმოადგენს იმ ადვოკატებს შორის შეხვედრას, ვისაც მედიაციაში კლიენტის წარმომადგენლობის გამოცდილება გააჩნიათ იმ კოლეგებთან, რომლებსაც ჯერ არ მიმართულებით არ უმუშავიათ. შეხვედრაზე სპიკერად მოწვეული იყო ლაშა კალანდაძე, გამოცდილი მედიატორი და ადვოკატი.

მედიაციაზე საუბრისას, ლაშა კალანდაძემ მონაწილეებს მედიაციის ძირითადი პრინციპები გააცნო და იმ ზოგად პრაქტიკულ ასპექტებზე ისაუბრა, რაც ადვოკატებმა კლიენტებისთვის მედიაციის შესახებ ინფორმაციის მიწოდებისას უნდა გაითვალისწინონ. მონაწილეებმა შემდეგი შეკითხვები დასვეს:  როგორ ვურჩიოთ კლიენტებს მედიაცია? რა ფაქტორები უნდა გავითვალისწინოთ მედიაციის პროცესში კლიენტების წარმოდგენისას? როგორ უნდა გავხდეთ მედიატორი? რა თანხის გადახდაა საჭირო მედიაციაში?  

ირაკლი ყანდაშვილმა, საქართველოს მედიატორთა ასოციაციის თავმჯდომარემ ისაუბრა, თუ  რატომ უნდა მოახდინონ ადვოკატებმა საკუთარი კლიენტების წინასწარი ინფორმირება მედიაციის შესახებ, რათა მოგვიანებით მოსამართლის მიერ საქმის მედიაციაში გადაცემა მათთვის მოულოდნელი არ იყოს. 

ირაკლი გელოვანმა, USAID სამართლის უზენაესობის პროგრამის ADR მრჩეველმა, რომელიც ასევე პრაქტიკოსი მედიატორიცაა, მონაწილეებს გაუზიარა თავისი მოსაზრებები იმის შესახებ, თუ როგორ უნდა ჩაერთონ ადვოკატები მედიაციის პროცესში და რა უნდა გაითვალისწინონ მათ  მედიაციის შესახებ კლიენტებისთვის რჩევის მიცემისას.

ადვოკატებთან მედიაციის შესახებ საუბრები მნიშვნელოვანია, რადგან მათი ცნობიერების დონე და მედიაციის სარგებლის აღქმა კვლავაც დაბალია. ამასთანავე, ადვოკატები ხშირად ვერ აცნობიერებენ, რომ მათ გააჩნიათ ეთიკური ვალდებულება საკუთარ კლიენტებს დავის ალტერნატიული გადაწყვეტის მეთოდების შესახებ აცნობონ. მსგავსი შეხვედრები შეახსენებს ადვოკატებს საკუთარი როლის შესახებ - დაეხმარონ კლიენტებს დავების მოგვარებისთვის ყველაზე შესაფერისი გზა მოძებნონ. ასევე, ამ შეხვედრების საშუალებით ხდება ადვოკატების ინფორმირება იმის შესახებ, თუ როგორ მუშაობს მედიაცია და როგორ უნდა მოხდეს ამ პროცესში მათი კლიენტების ინტერესების საუკეთესოდ წარმოდგენა.