2024 წლის 21-22 მარტს, საქართველოს ადვოკატთა ასოციაციამ (GBA) USAID სამართლის უზენაესობის პროგრამის მხარდაჭერით გამართა შეხვედრა სამოქალაქო საზოგადოების წარმომადგენლებთან და სახალხო დამცველის აპარატთან (PDO) საქართველოს სასამართლო სისტემაში არსებული გამოწვევების განსახილველად.

დისკუსიაში აქტიურად მონაწილეობდა ოცდასამი დამსწრე, მათ შორის იყვნენ წარმომადგენლები საქართველოს ადვოკატთა ასოციაციის აღმასრულებელი საბჭოდან, GBA-ს მართლმსაჯულებისა და სასამართლო რეფორმების კომიტეტიდან, სახალხო დამცველის აპარატიდან და კოალიციიდან დამოუკიდებელი და გამჭვირვალე სასამართლოსთვის.

შეხვედრაზე მისასალმებელი სიტყვით გამოვიდნენ GBA-ს თავმჯდომარე დავით ასათიანი და საქართველოს სახალხო დამცველი ლევან იოსელიანი. მათ ხაზი გაუსვეს ინფორმაციის გაცვლისა და თანამშრომლობის მნიშვნელობას ისეთ საკითხებზე, როგორიცაა სასამართლო სისტემის სამომავლო განვითარება საქართველოში.

შეხვედრის დროს მხარეებმა ერთმანეთს გაუზიარეს ინფორმაცია მიმდინარე საქმიანობის შესახებ, მათ შორის უკვე განხორციელებული ინიციატივების თაობაზე. GBA-ს მართლმსაჯულებისა და სასამართლო რეფორმის კომიტეტის თანათავმჯდომარემ სოფიო სოხაძემ მიმოიხილა კომიტეტის მუშაობა და ხაზი გაუსვა GBA-ს ჩართულობის მნიშვნელობას უზენაესი სასამართლოს მოსამართლეობის კანდიდატების შერჩევის პროცესში. მან ასევე ისაუბრა გასულ წელს GBA-ს მიერ შემუშავებულ მექანიზმზე/კრიტერიუმებზე პირველი და მეორე ინსტანციის სასამართლოების მოსამართლეობის კანდიდატების შესაფასებლად, და ასევე განიხილა ანალიტიკური ანგარიში თემაზე - საქმეთა გაჭიანურების პრობლემა საქართველოს საერთო სასამართლოებში და მისი გადაჭრის სავარაუდო გზები. GBA-ს აღმასრულებელმა დირექტორმა, გიორგი ჭეხანმა ისაუბრა GBA-ს შეხედულებებზე საქართველოში სანდო, გამჭვირვალე და ხარისხიანი სასამართლო სისტემის ჩამოყალიბების შესახებ და იმ საკითხებზე, თუ რა არის საჭირო აღნიშნულის მისაღწევად.

მონაწილეებმა ასევე განიხილეს ევროკომისიის რეკომენდაცია მოსამართლეთა ვეტინგთან დაკავშირებით. კოალიციის წარმომადგენლებმა ისაუბრეს თავიანთ კვლევებსა და შეხედულებებზე ვეტინგის საკანონმდებლო ჩარჩოსა და ამ პროცედურის სხვა პრაქტიკული ასპექტების შესახებ, რამაც პროცედურის პოტენციური რისკებისა და გამოწვევების სრულყოფილი სახე ჩამოაყალიბა.