საქართველოს არბიტრთა ასოციაციამ, USAID სამართლის უზენაესობის პროგრამის მხარდაჭერით შეხვედრას უმასპინძლა, რომელშიც 30 ექსპერტი და დაინტერესებული პირი მონაწილეობდა. შეხვედრაზე მონაწილეებმა სამომხმარებლო არბიტრაჟის მარეგულირებელი ჩარჩო კანონმდებლობის გაუმჯობესების საჭიროებაზე იმსჯელეს. დამწრეთა შორის ბანკების, სადაზღვევო კომპანიებისა და მიკროსაფინანსო ორგანიზაციების წარმომადგენლები იყვნენ.

მონაწილეებს გახსნითი სიტყვით რუსუდან ჭკუასელმა, საქართველოს არბიტრთა ასოციაციის თავმჯდომარემ და ირაკლი გელოვანმა, პროგრამის ADR მრჩეველმა მიმართეს. ჯაბა გველებიანმა, საქართველოს არბიტრთა ასოციაციის სამომხმარებლო არბიტრაჟის სამუშაო ჯგუფის ხელმძღვანელმა სამომხმარებლო არბიტრაჟის რეგულირების ძირითადი ასპექტები წარმოადგინა, რომელიც ისეთ საკითხებს ეხებოდა, როგორიცაა საარბიტრაჟო შეთანხმებები, პროცედურული სტანდარტები, არბიტრის კვალიფიკაცია, ინტერესთა კონფლიქტის მართვა და შეტყობინებისა და აღსრულების პროცედურები.

შეხვედრის დროს გამართული დისკუსიისას გამოიკვეთა ისეთი საკითხები, როგორიცაა სააპელაციო სასამართლოს მიერ საარბიტრაჟო შეთანხმებების შესახებ დეტალური ინფორმაციის გამოთხოვის გამო საარბიტრაჟო პროცესის შენელება. მონაწილეებმა შეშფოთება გამოთქვეს იმასთან დაკავშირებით, რომ თუ ამგვარი მიდგომა კვლავაც გაგრძელდება, საარბიტრაჟო შეთანხმებები ეფექტური აღარ იქნება, რაც პირდაპირ სასამართლოსადმი მიმართვას უფრო მისაღებ ფორმად გადააქცევს.

მონაწილეებმა ასევე განიხილეს საარბიტრაჟო გადაწყვეტილებების სასამართლო განხილვის ფარგლები, სადაც იმსჯელეს იმის შესახებ ეს როლი სასამართლოებს, თუ ზედამხედველობის ალტერნატიულ ორგანოს უნდა ჰქონდეს და კანონით განსაზღვრული უნდა იყოს თუ არა სასამართლოს ჩართულობის ხარისხი.  მათ ასევე იმსჯელეს ხელშეკრულებების დისტანციური ხელმოწერის პრობლემებსა და სააპელაციო სასამართლოს მხრიდან ასეთი ხელშეკრულებების აღიარების სურვილის ნაკლებობაზე, ასევე შეტყობინების სტანდარტიზებული მიწოდებისა და დოკუმენტების წარმოების აუცილებლობაზე.