2024 წლის 13 აპრილს, ამერიკელმა მოსამართლემ მინესოტას შტატიდან - ტიმოთი ბალანდმა, რომელიც USAID სამართლის უზენაესობის პროგრამის ფარგლებში მოსამართლეთა გაცვლითი მიმართულების აქტივობებში იღებს მონაწილეობას, გორში ადგილობრივი ადვოკატებისთვის სემინარი ჩაატარა.

ღონისძიებაში, რომელსაც საქართველოს ახალგაზრდა იურისტთა ასოციაციის (საია) ადგილობრივმა ფილიალმა უმასპინძლა, კერძო სექტორში და საიას გორის ოფისში მომუშავე თვრამეტი იურისტი მონაწილეობდა.

სემინარზე მოსამართლე ბალანდმა განიხილა სხვადასხვა სამართლებრივი საკითხები, მათ შორის ბავშვთა უფლებები და განსხვავებები საქართველოსა და აშშ-ის სასამართლო სისტემებს შორის.

მოსამართლე ბალანდმა ასევე ისაუბრა მინესოტას ადამიანის უფლებათა დეპარტამენტის საქმიანობაზე და შეხვედრაზე დამსწრეებს გაუზიარა ინფორმაცია ადამიანის უფლებების დარღვევის შესახებ დაფიქსირებული ბრალდებების განხილვის მექანიზმებზე. მან ასევე ისაუბრა სასჯელის სახით გამოსასწორებელი/საზოგადოების კეთილდღეობისკენ მიმართული სამუშაოების შესრულებაზე, სავალდებულო ტრენინგებზე და სხვა ინსტრუმენტებზე, რომლებიც გამოიყენება გამომძიებლებისა და ადვოკატების მიერ მართლმსაჯულების განსახორციელებლად.

დისკუსიამ ასევე მოიცვა მინესოტაში ბავშვის მეურვისთვის ალიმენტის გადახდის საკითხები, კერძოდ მან ისაუბრა მინესოტაში არსებულ წესდებაზე, რომელშიც განსაზღვრულია ალიმენტის გამოთვლის წესი. გარდა ამისა, მოსამართლე ბალანდმა დამსწრე ადვოკატებს გაუზიარა თავისი გამოცდილება ისეთ საკითხებზე, როგორიცაა ბავშვების უფლება ჰქონდეთ უშუალო და პირდაპირი წვდომა სასამართლოსთან, მეურვეობის საქმეებში ყურადსაღები ფაქტორები და საოჯახო სამართლის სხვადასხვა ასპექტები.

USAID სამართლის უზენაესობის პროგრამის ფარგლებში, მოსამართლე ბალანდი მუდმივად თანამშრომლობს სხვადასხვა რეგიონის ქართველ მოსამართლეებთან და იურიდიული პროფესიის სხვა წარმომადგენლებთან, რათა მათ თავისი სასამართლო გამოცდილება გაუზიაროს. მოსალოდნელია, რომ მსგავსი ტიპის აქტივობები 2024 წლის ივნისამდე გაგრძელდება, რაც ხელს შეუწყობს პროფესიონალიზმის მუდმივ განვითარებას ქართულ იურიდიულ საზოგადოებაში.