საქართველოს ადვოკატთა ასოციაციამ (GBA), USAID სამართლის უზენაესობის პროგრამის მიერ მხარდაჭერილი ახალი ორწლიანი პროექტის პრეზენტაცია გამართა, რომლის მიზანი საქართველოში იურიდიული პროფესიისა და მართლმსაჯულების სისტემის გაძლიერებაა.

აღნიშნული ინიციატივა GBA-ს საშუალებას აძლევს განაახლოს მუშაობა განგრძობადი იურიდიული განათლების მიმართულებით, გააფართოოს ბენჩ-ბარის ტიპის ურთიერთთანამშრომლობა, გააძლიეროს ასოციაციის ეთიკის კომისიის საქმიანობა, და განავითაროს პრო-ბონო სისტემის კონცეფცია.

ღონისძიების მონაწილეებს მისასალმებელი სიტყვით მიმართა საქართველოს ადვოკატთა ასოციაციის თავმჯდომარემ, დავით ასათიანმა, რომელმაც მადლიერება გამოხატა USAID სამართლის უზენაესობის პროგრამის მიმართ განგრძობადი მხარდაჭერასა და პარტნიორობაზე. მან ასევე ხაზი გაუსვა USAID-ის უმნიშვნელოვანეს წვლილს, წლების განმავლობაში GBA-ს განვითარების პროცესში მონაწილეობისთვის.

თამთა დევდარიანმა, GBA-ს ანალიტიკური და საკომიტეტო საქმიანობის დეპარტამენტის ხელმძღვანელმა მონაწილეებს დეტალურად გააცნო 2022-2023 წლებში USAID-ის მიერ მხარდაჭერილი პროექტის ფარგლებში მიღწეული წარმატებები. პროექტის ფარგლებში მოხდა ასოციაციის თემატური კომიტეტების ორგანიზაციული და ანალიტიკური შესაძლებლობების განვითარება, ჩატარდა ბენჩ-ბარ შეხვედრები. პროექტი ასევე მოიცავდა ადვოკატთა საკვალიფიკაციო გამოცდის ობიექტურად და გამჭვირვალედ ადმინისტრირების კუთხით ასოციაციის შესაძლებლობების განვითარებას. მათ შორის შემუშავდა ანალიტიკური დოკუმენტი სასამართლოში საქმეთა ნაკადების მართვასთან დაკავშირებით და ასევე ასოციაციის მიერ პირველი და მეორე ინსტანციის მოსამართლეობის კანდიდატების შეფასების კრიტერიუმებსა და მექანიზმებზე.

თავის მისასალმებელ სიტყვაში, ლიზა კოვაკმა, USAID/საქართველოს დემოკრატიის, უფლებებისა და მმართველობის ოფისის დირექტორის მოვალეობის შემსრულებელმა, ხაზი გაუსვა USAID-ის მისწრაფებას მხარი დაუჭიროს სამართლის უზენაესობას საქართველოში და ასოციაცია ბოლო ათწლეულის განმავლობაში მიღწეული პროგრესისთვის შეაქო. მას სწამს, რომ საქართველოში იურიდიული პროფესიისა და მართლმსაჯულების სისტემის გაძლიერების პროექტი ხელს შეუწყობს GBA-ს განვითარების გაგრძელებას და საქართველოში სამართლის უზენაესობის განმტკიცებას.

ღონისძიებას დაახლოებით 90 ადამიანი ესწრებოდა. მათ შორის იყვნენ მოსამართლეები, პროკურატურის წევრები, საერთაშორისო ორგანიზაციების წარმომადგენლები და სამოქალაქო საზოგადოების ლიდერები.