2024 წლის 22-24 ნოემბერს, USAID სამართლის უზენაესობის პროგრამის მხარდაჭერით, საქართველოს მედიატორთა ასოციაციამ, საქართველოს ადვოკატთა ასოციაციის შრომის სამართლის კომიტეტთან თანამშრომლობით, სამუშაო შეხვედრა გამართა, რომელიც შრომითი კატეგორიის დავებზე სამედიაციო მორიგებებს და პრაქტიკაში არსებული გამოწვევების განხილვას ეხებოდა. მას 14 მონაწილე ეწრებოდა, რომლებიც საქართველოს მედიატორთა ასოციაციის აღმასრულებელი საბჭოს შრომის სამართლის მიმართულებით მომუშავე წევრებსა და საქართველოს ადვოკატთა ასოციაციის შრომის სამართლის კომიტეტს წარმოადგენდნენ.   

მონაწილეებს გახსნითი სიტყვით მიმართეს ირაკლი ყანდაშვილმა, საქართველოს მედიატორთა ასოციაციის თავმჯდომარემ და ეკატერინე ლორთქიფანიძემ, პროგრამის ADR სპეციალისტმა, რომლებმაც ხაზი გაუსვეს ნათლად ჩამოყალიბებული და აღსრულებადი სამედიაციო შეთანხმებების შედგენის მნიშვნელობას, რათა გამარტივდეს სასამართლოს მიერ მათი დამტკიცების პროცესი და შრომითი დავების მოგვარება ეფექტიანად განხორციელდეს.

ირაკლი ყანდაშვილმა მონაწილეებს საქართველოს მედიატორთა ასოციაციის მიერ იდენტიფიცირებული საკითხები გააცნო, რომლის მიხედვითაც შრომითი კატეგორიის დავებზე არსებული სამედიაციო შეთანხმებების დაახლოებით 40%, რომელიც სასამართლოს დასამტკიცებლად წარედგინება, არ არის ნათლად ჩამოყალიბებული და სამართლებრივად აღსრულებადი, რის გამოც ხშირია მოსამართლეების მიერ დამატებითი სხდომების ჩატარების საჭიროება, რაც დამატებითი დროისა და რესურსების ხარჯვას იწვევს. ძირითადი საკითხები ეხებოდა ხელფასის შესახებ კონკრეტული ინფორმაციის ნაკლებობას (მაგ., როგორიცაა გადახდის პერიოდი და ის საკითხი, არის თუ არა თანხა დაბეგრილი, თუ დასაბეგრი), ასევე პოზიციაზე აღდგენასთან დაკავშირებულ სპეციფიკურ დეტალებს.  

სამუშაო შეხვედრის მთავარი მიზანი იყო შრომითი კატეგორიის დავებზე სამედიაციო მორიგების აქტის პროექტის შემუშავება და დამტკიცება, რომლითაც მედიატორები და მხარეთა წარმომადგენლები ისარგებლებენ იმის უზრუნველსაყოფად, რომ შეთანხმებები იყოს ნათლად ჩამოყალიბებული, დეტალური და სამართლებრივად აღსრულებადი. პროცესს ფასილიტაციას უწევდა თამარ სურმავა, საქართველოს ადვოკატთა ასოციაციის შრომის სამართლის კომიტეტის თანათავმჯდომარე. შეხვედრის მონაწილეებმა მოამზადეს სამედიაციო მორიგების აქტის პროექტი, რომლის გაზიარებაც მოხდება საქართველოს მედიატორთა ასოციაციისა და საქართველოს ადვოკატთა ასოციაციის წევრებთან, რათა მომავალში შრომითი კატეგორიის დავების შემთხვევაში მოხდეს აღნიშნული დოკუმენტით სარგებლობა.  

სამუშაო შეხვედრის შედეგად შეიქმნა დეტალური შაბლონი, რომელიც მოიცავს ისეთ საკითხებს, როგორიცაა პოზიციაზე აღდგენა, იძულებითი განაცდურის ანაზღაურება, კომპენსაციის გადახდა, შესაბამისი გადახდის გრაფიკის გაწერა და ანგარიშსწორება ნაღდი თუ უნაღდო ფორმით. აღნიშნული დოკუმენტით ისარგებლებენ მხარეები და მედიატორები, რაც მოახდენს იმის უზრუნველყოფას, რომ შრომითი კატეგორიის სამედიაციო შეთანხმებები აკმაყოფილებდეს სამართლებრივ სტანდარტებს და აღარ იყოს საჭირო დამატებითი სასამართლო განმარტებების გაკეთება.