საქართველოს მედიატორთა ასოციაციამ, USAID სამართლის უზენაესობის პროგრამის მხარდაჭერით, საგარეჯოში შეხვედრა გამართა, რომელიც ადგილობრივი მოსახლეობისთვის მედიაციისა და მისი უპირატესობების შესახებ ინფორმაციის მიწოდებას ისახავდა მიზნად. ამ შეხვედრის ორგანიზებაში საქართველოს მედიატორთა ასოციაციას დემოკრატიული ჩართულობის ცენტრების ქსელის (NCCE) საგარეჯოს  ოფისი დაეხმარა.

შეხვედრას თამარ იმნაიშვილი, საქართველოს მედიატორთა ასოციაციის აღმასრულებელი დირექტორი და ირაკლი გელოვანი, პროგრამის ADR მრჩეველი უძღვებოდნენ. მათ ისაუბრეს მედიაციისა და მისი ძირითადი პრინციპების შესახებ, ახსნეს, თუ რა ტიპის საქმეები შეიძლება იყოს მედიაციისთვის შესაფერისი, რა ეტაპები აქვს მედიაციის პროცესს, რამდენ ხანს გრძელდება იგი, როგორ ხდება მედიატორის შერჩევა და რა განსხვავებაა სასამართლო და კერძო მედიაციას შორის.

შეხვედრას  30 ადგილობრივი მასწავლებელი, ადვოკატი, სოციალური მუშაკი, ფსიქოლოგი, არასამათვრობო ორგანიზაციებისა და ადგილობრივი თვითმმართველობის  წარმომადგენელი დაესწრო. ისინი დაინტერესდნენ, თუ როგორ შეიძლება გახდე  მედიატორი, რამდენი მედიატორია საქართველოში, ვინ იხდის მედიაციის მომსახურების საფასურს, არსებობენ თუ არა სპეციალურად მომზადებული და ლიცენზირებული მედიატორები, რომლებიც ბავშვებთან დაკავშირებულ საკითხებზე მუშაობენ, რა როლი ესკისრება ადვოკატს მედიაციის პროცესში, რამდენად აქტიურად იყენებენ მედიაციას საქართველოში და რა კატეგორიის საქმეებისთვის.

შეხვედრის ბოლოს რამდენიმე მონაწილემ მედიატორობის სურვილი გამოხატა. საერთო ჯამში, შეხვედრის საშუალებით საგარეჯოს მოსახლეობაში მედიაციის ცნებისა და დადებითი მხარეების შესახებ ცნობიერების ამაღლება მოხდა.