საქართველოს მედიატორთა ასოციაციამ, USAID სამართლის უზენაესობის პროგრამის მხარდაჭერით, საქართველოს ადვოკატთა ასოციაციის 21 ახალ წევრს მედიაციის შესახებ ინფორმაცია მიაწოდა.

შეხვედრის საშუალებით ადვოკატების ახალი თაობისთვის მედიაციის გაცნობა და იმის დემონსტრირება მოხდა, თუ რამდენად მნიშვნელოვანი როლი ენიჭებათ ადვოკატებს დავის გადაწყვეტის ამ მექანიზმის გამართული ფუნქციონირებისთვის.

ღონისძიება ირაკლი ყანდაშვილის, საქართველოს მედიატორთა ასოციაციის თავმჯდომარისა და ირაკლი გელოვანის, USAID სამართლის უზენაესობის პროგრამის ADR მრჩევლის მისასალმებელი სიტყვებით დაიწყო, სადაც თანამედროვე სამართლებრივ პრაქტიკაში მედიაციის მნიშვნელობის ხაზგასმა მოხდა.   

ყანდაშვილმა ხაზგასმით აღნიშნა, თუ რამდენად მნიშვნელოვან როლს თამაშობენ ადვოკატები მედიაციის პროცესში. მან განმარტა, თუ რამდენად ეყრდნობიან კლიენტები ადვოკატის მითითებებს და ის, თუ როგორ წარუდგენს ადვოკატი კლიენტს მედიაციის პროცესს, ეს დავის გადაწყვეტის ამ მეთოდის მიმართ კლიენტების აღქმასა და დამოკიდებულებას აყალიბებს. მან განმარტა მედიაციის უპირატესობები, კონფიდენციალურობის არსი და კომპრომისის მნიშვნელობა.

შეხვედრის დროს მონაწილეებმა ერთმანეთს პრაქტიკული გამოცდილება გაუზიარეს, სადაც  შედეგზე ორიენტირებული ხელშეკრულებების მნიშვნელობასა და მედიაციის საშუალებით დროის დაზოგვის უპირატესობაზე ხაზგასმა მოხდა.