საქართველოს მედიატორთა ასოციაციამ, USAID სამართლის უზენაესობის პროგრამის მხარდაჭერით, საქართველოს ადვოკატთა ასოციაციის ახალ წევრებთან შეხვედრა გამართა.

შეხვედრამ საშუალება მისცა ახალ წევრებს დეტალური ინფორმაცია მიეღოთ მედიაციის პროცესის შესახებ და გაეგოთ მედიაციის პროცესში კლიენტების ეფექტური წარმომადგენლობის მნიშვნელობა.  

ღონისძიება გახსნეს ირაკლი ყანდაშვილმა, მედიატორთა ასოციაციის თავმჯდომარემ და ეკატერინე ლორთქიფანიძემ, USAID სამართლის უზენაესობის პროგრამის ADR სპეციალისტმა.

გამოსვლისას ირაკლი ყანდაშვილმა ხაზი გაუსვა ადვოკატების საფუძვლიანი ცოდნის მნიშვნელობას მედიაციის პროცესთან დაკავშირებით. მან აღნიშნა, რომ დღევანდელი რეალობაა ის, რომ მოსამართლეები ახდენენ საქმეთა მედიაციაში გადამისამართებას (რასაც შრომითი დავების შემთხვევაში ავტომატური ხასიათი აქვს) და რომ ადვოკატებს უნდა შეეძლოთ კლიენტებისთვის დავის გადაწყვეტის იმ ერთ-ერთი ეფექტური საშუალების შესახებ ინფორმაციის მიწოდება, რომელიც დღეს ხელმისაწვდომია. ირაკლი ყანდაშვილმა ასევე მითითება გააკეთა ადვოკატის მოვალეობაზე, რომელიც ადვოკატთა პროფესიული ეთიკის კოდექსითაა გათვალისწინებული და ამ შესაძლებლობის შესახებ კლიენტისთვის ინფორმაციის მიწოდებას გულისხმობს. მან ხაზგასმით აღნიშნა, რომ ის, თუ როგორ გააკეთებენ ამას ადვოკატები, მნიშვნელოვანი ზეგავლენა ექნება კლიენტების აღქმაზე დავის გადაწყვეტის ამ მეთოდის შესახებ.

ღონისძიებაში მონაწილეობა მიიღო ოცდაორმა ახლადგაწევრიანებულმა ადვოკატმა, რომლებიც თბილისს, რუსთავს, სიღნაღსა და გარდაბანს წარმოადგენდნენ. დისკუსიები ძირითადად მედიაციის უპირატესობების, სასამართლო და კერძო მედიაციას შორის განსხვავებების, ხელშეკრულებაში მედიაციის პროცესში ჩართულობის ჰონორარის გათვალისწინების საჭიროების, მედიაციის, როგორც თვითრეალიზების ახალი პლატფორმის შესახებ წარიმართა. შეხვედრაზე დამსწრე ადვოკატთა ასოციაციის ახალი წევრები დარწმუნდნენ, რომ მედიაციის, როგორც დავის გადაწყვეტის ერთ-ერთი მექანიზმის გათვალისწინებამ შესაძლოა გააუმჯობესოს მათ მიერ კლიენტებისთვის გაწეული კონსულტაციის ხარისხი.

ადვოკატებთან რეგულარული შეხვედრები, რასაც USAID სამართლის უზენაესობის პროგრამის საგრანტო მხარდაჭერით საქართველოს მედიატორთა ასოციაცია ახორციელებს, პოზიტიურ ზეგავლენას ახდენს ქვეყანაში მედიაციის განვითარებაზე. ამ ტიპის შეხვედრები ხელს უწყობს მედიაციის შესახებ ინფორმირებულობის დონის ზრდას და დავის გადაწყვეტის ამ მეთოდის უფრო აქტიურად გამოყენებას.