2023 წლის 14 დეკემბერს, საქართველოს მედიატორთა ასოციაციამ, USAID სამართლის უზენაესობის პროგრამის მხარდაჭერით, თბილისში მოღვაწე მოსამართლეებსა და მედიატორებს შორის მეორე სამუშაო შეხვედრას (ბენჩ-ბარს) უმასპინძლა.

შეხვედრას თბილისის საქალაქო და სააპელაციო სასამართლოების ოთხი მოსამართლე და ათი მედიატორი ესწრებოდა. მისი მთავარი მიზანი მედიაციის პროცესში საოჯახო დავების დროს ბავშვის საუკეთესო ინტერესების დაცვისა და ამ საკითხთან დაკავშირებული გამოწვევების განხილვა იყო.  

შეხვედრა ირაკლი ყანდაშვილის, საქართველოს მედიატორთა ასოციაციის თავმჯდომარისა და ირაკლი გელოვანის, USAID სამართლის უზენაესობის პროგრამის ADR მრჩევლის მისასალმებელი სიტყვებით გაიხსნა. ირაკლი ყანდაშვილმა გამოსვლისას ხაზი გაუსვა მსგავსი შეხვედრების მნიშვნელობას, მათ როლს თანამშრომლობის ხელშეწყობის, ურთიერთგაგების გაუმჯობესებისა და მართლმსაჯულების სისტემის ეფექტიანობის ზრდის საქმეში.

შეხვედრის დროს მოხდა ისეთი საკითხების განხილვა, როგორიცაა: საქმეთა ტიპები, რომელთა მედიაციაში გადამისამართებას მოსამართლეები ავტომატურად ახდენენ (მაგ. საოჯახო, ქონებრივი და სამემკვიდრეო დავები), ბავშვების ჩართულობით მიმდინარე დავების მახასიათებლები და მსგავს საქმეებში ფსიქოლოგების ჩართულობის აუცილებლობა. შეხვედრაზე ასევე განიხილეს მხარეებთან ერთობლივი საინფორმაციო შეხვედრის გამართვის შესაძლებლობა იქამდე, ვიდრე საქმე ოფიციალურად გადაეცემა მედიაციაში. აქვე ასევე აღინიშნა საზოგადოებრივი ცნობიერების ამაღლების საჭიროებაც.

ხათუნა ჯინორიამ, თბილისის საქალაქო სასამართლოს მოსამართლემ, რომელიც მედიაციის აქტიური მხარდამჭერია, საკუთარი დაკვირვება გააზიარა, რომლის მიხედვითაც მედიაციაში გადამისამართებული ყოველი მეხუთე საქმე მხარეებს შორის მორიგებით სრულდება. მან ხაზგასმით აღნიშნა, რომ აუცილებელია უფრო აქტიური მუშაობა იმისთვის, რომ ადვოკატები მეტად გახდნენ მედიაციის პროცესის მხარდამჭერები.

დისკუსიის შედეგად შეხვედრის მონაწილეებმა მედიაციის პრაქტიკის გაუმჯობესებისთვის რამდენიმე წინადადება ჩამოაყალიბეს. კერძოდ:

• მედიაციის პროცესში ბავშვის ინტერესების უკეთ დაცვისთვის მედიატორებისთვის ტრენინგ პროგრამების შემუშავების აუცილებლობა;
• პირველი სხდომის თარიღის განსაზღვრის შემდეგ, მოსამართლეებმა მხარეებს უნდა მოუწოდონ, რომ სასამართლო განხილვის დაწყებამდე პერიოდში ცადონ მედიაცია. ეს იქნება მოტივაცია მხარეებისთვის, რომ ჩაერთონ მედიაციის პროცესში, რადგან მათ ექნებათ გარანტია, რომ მედიაციის წარუმატებლობის შემთხვევაში მათი საქმის განხილვა მოსამართლის მიერ კონკრეტული თარიღიდან დაიწყება;
• მოხდეს მეტი მსგავსი შეხვედრის ორგანიზება ადვოკატების ჩართულობით, ასევე მედიატორების ტრენინგი ისეთ საქმეებში ჩართულობისთვის, სადაც ბავშვები მონაწილეობენ.