2024 წლის 12 მარტს, საქართველოს პროფესიული კავშირების გაერთიანებამ (GTUC), USAID სამართლის უზენაესობის პროგრამის მხარდაჭერით, ქუთაისში საინფორმაციო შეხვედრა გამართა ქუთაისის უნივერსიტეტისა და აკაკი წერეთლის სახელმწიფო უნივერსიტეტების სტუდენტთან ქალთა ისტორიის თვის ფარგლებში.  

მას შემდეგ, რაც GTUC-ის წარმომადგენელმა მიმოიხილა სტუდენტებთან დაკავშირებული სტანდარტული შრომითი პრაქტიკები, თავად სტუდენტებმა დასვეს კითხვები. კითხვები ეხებოდა ახალგაზრდების წინაშე არსებულ ბარიერებსა და პრობლემებს რომელთაც ისინი აწყდებიან დასაქმებისას, სტაჟირებისა და გამოსაცდელი ვადით ხელშეკრულებების ბოროტად გამოყენებას, შრომის უსაფრთხოებას, დისკრიმინაციასა და მის ფორმებს, ქალთა შრომით უფლებებს, არაფორმალურად დასაქმებულთა უფლებებს და თანასწორობის დაცვის მექანიზმებს, და შრომის ინსპექციის საქმიანობას ამ მიმართულებით.

„ამგვარი დისკუსიები განსაკუთრებით მნიშვნელოვანია, რადგან ის ინფორმაცია მივიღე, რაც დამეხმარება დასაქმებისას ჩემი უფლებების დაცვაში. ფაქტობრივად, შრომითი უფლებები არსად არ ისწავლება და შესაბამისად ინფორმაციაც ნაკლები გვაქვს, მაშინ როცა ყველა ჩვენთაგანი უნივერსტიტეტში ან სამსახურს ეძებს ან უკვე მუშაობს“ - ამბობს ცოტნე, შეხვედრის ერთ-ერთი მონაწილე აკაკი წერეთლის სახელმწიფო უნივერსიტეტიდან.

„მიუხედავად იმისა, რომ თითქოს ახალგაზრდების დასაქმება ერთი შეხედვით ადვილია, სინამდვილეში განსაკუთრებით ახალგაზრდა გოგოებს გვექმნება უამრავი ბარიერი დასაქმებისას. პირადადაც და ჩემს გარშემოც, არაერთხელ გვქონია შემთხვევა, როდესაც პირდაპირ გვკითხეს დაოჯახებული ხომ არ ვიყავით და მცირეწლოვანი შვილები ხომ არ გვყავდა. აღარაფერს ვამბობ იმაზე, რომ ფაქტობრივად შეუძლებელია სტუდენტობის და სამუშაოს შეთავსება. ბევრს ჩემს გარშემო, მუშაობის დაწყების მერე, მოუწიათ აკადემიური შვებულების აღება და სწავლის შეწყვეტა“ - ამბობს ქეთა, მეორე მონაწილე.