საქართველოს სასამართლოს გუშაგმა, USAID სამართლის უზენაესობის პროგრამის მხარდაჭერით, მოქალაქეთა მიერ სასამართლოს მონიტორინგის პროექტის მეორე ეტაპი დაიწყო. პროექტი შეაფასებს სასამართლოს მიუკერძოებლობას და დამოუკიდებლობას საარჩევნო დავების განხილვის პროცესში. მონიტორინგი განხორციელდება როგორც წინასაარჩევნო, ასევე არჩევნების შემდგომ პერიოდში. ორგანიზაცია ასევე, შეაფასებს იუსტიციის უმაღლესი საბჭოს საქმიანობას.

2024 წლის აგვისტოში საქართველოს სასამართლო გუშაგის გუნდმა შეიმუშავა პროექტის მეთოდოლოგია ექსპერტების, მაია ბაქრაძისა (დამოუკიდებელი იურისტების ჯგუფი) და ირმა პავლიაშვილის (ღია სივრცე კავკასიის ხელმძღვანელი) ჩართულობით. პროექტის სამუშაო შეხვედრაზე მაია ბაქრაძემ ხაზი გაუსვა არჩევნების დროს სასამართლო პროცესების გამჭვირვალობის მნიშვნელობას. მისი თქმით: „თუკი სასამართლო პროცესები გამჭვირვალე  და სამართლიანი იქნება, მოსამართლე დავებს მიუკერძოებლად განიხილავს და გადაწყვეტილებებს დამაჯერებლად დაასაბუთებს, მოქალაქეებს მთლიანად საარჩევნო პროცესის და შედეგების მიმართ  ექნებათ ნდობა, რაც პოლიტიკურ კრიზისებს აგვაცილებს თავიდან. ამ პროექტის ფარგლებში მოქალაქეები თავად დააკვირდებიან სასამართლო პროცესებს და ობიექტურ მონაცემებთან ერთად თავიანთ აღქმებს გაუზიარებენ.“

ირმა პავლიაშვილის მოსაზრებით, დამოუკიდებელ და მიუკერძოებელ სასამართლოს შეუძლია გადამწყვეტი როლი ითამაშოს ამომრჩეველთა უფლებების დაცვასა და სამართლიანი საარჩევნო გარემოს უზრუნველყოფაში.

2024 წლის 31 აგვისტოს, საქართველოს სასამართლოს გუშაგმა დაასრულა 37 მოხალისე დამკვირვებლის შერჩევა მთელი საქართველოდან, რომლებიც მონიტორინგის საქმიანობის დაწყებამდე, სექტემბრის შუა რიცხვებისთვის, ტრენინგს გაივლიან. ერთ-ერთმა დამკვირვებელმა, გიორგი თათანაშვილმა განაცხადა: „აუცილებელია, მოქალაქეებმა გააცნობიერონ თავიანთი როლი სამართლიანი სასამართლოს ჩამოყალიბებაში. ამ პროცესში სასიცოცხლოდ მნიშვნელოვანი იქნება თითოეული დამკვირვებლის წვლილი.“

მონიტორინგი განხორციელდება შემდეგ ქალაქებში: თბილისი, ამბროლაური, ახალქალაქი, ახალციხე, ბათუმი, ბოლნისი, გორი, გურჯაანი, ზესტაფონი, ზუგდიდი, მცხეთა, ოზურგეთი, რუსთავი, სენაკი, ფოთი, ქუთაისი, ხაშური, ხელვაჩაური.

ეფექტიანი თანამშრომლობის უზრუნველსაყოფად, პროექტის ფარგლებში შეხვედრები გაიმართება პოლიტიკური პარტიებისა და სამოქალაქო საზოგადოების წარმომადგენლებთან. მონიტორინგის დასრულების შემდეგ, საქართველოს სასამართლოს გუშაგი გამოაქვეყნებს ანგარიშს, რომელიც მონიტორინგის მიგნებებს ასახავს.