საქართველოს სახალხო დამცველის აპარატმა და USAID სამართლის უზენაესობის პროგრამამ სამუშაო ადგილზე სექსუალური შევიწროების პრევენციისა და მასზე რეაგირების კამპანია დაიწყეს
დასაქმების ადგილზე სექსუალური შევიწროება მძიმედ აისახება დასაქმებულზე და იწვევს სამუშაოს შესრულების შეფერხებას, ფიზიკური ან ფსიქიკური ჯანმრთელობის მდგომარეობის გაუარესებას. სექსუალური ხასიათის ნებისმიერი ქცევა, რომელიც მეორე პირისთვის არანებაყოფლობითი და არასასურველია და მას არაკომფორტულ გარემოს უქმნის, არის კანონით აკრძალული.
2023 წლის ნომერბერში, USAID სამართლის უზენაესობის პროგრამის მხარდაჭერით, სახალხო დამცველის აპარატმა, დაიწყო სამუშაო ადგილზე სექსუალური შევიწროების პრევენციისა და მასზე რეაგირების სამთვიანი კამპანია.
კამპანიის ფარგლებში შემუშავდა პოსტერები, რომელზეც ასახულია სამუშაო ადგილზე სექსუალური შევიწროების სხვადასხვა ფორმები, ვერბალური, არავერბალური, ფიზიკური და „მომსახურება მომსახურების სანაცვლოდ“. პოსტერები განთავსდა თბილისის მეტროს ყველა ვაგონში და ექვს ბაქანზე, მათ შორის ახმეტელის თეატრის, დიდუბის, ვაგზლის მოედნის, რუსთაველის, თავისუფლებისა და ტექნიკური უნივერსიტეტის ჩათვლით. ბოლო მონაცემებით, თბილისის მეტროპოლიტენს, მხოლოდ მიმდინარე წლის ოქტომბერში, ჰყავდა 15 მილიონი ვიზიტორი.
ამ კამპანიის მთავარი მიზანი, სექსუალური შევიწროების შესახებ საზოგადოების ცოდნის ამაღლებაა და მათი ინფორმირებულობა, იმის შესახებ, თუ როგორ შეუძლიათ დაიცვან საკუთარი უფლებები, თუკი გახდებიან სამუშაო ადგილზე სექსუალური შევიწროების მსხვერპლი, ან შეესწრებიან მსგავს შემთხვევას სამსახურში. გარდა ამისა, კამპანია გაზრდის დამსაქმებლების ინფორმირებულობას, იმის შესახებ, რომ შრომის უფლებების დაცვა და დისკრიმინაციისგან თავისუფალი სამუშაო გარემოს შექმნა არის ვალდებულება, რაც მათ კანონმდებლობით აკისრიათ.
“საქართველოს სახალხო დამცველი როგორც, ანტი-დისკრიმინაციული მექანიზმი, სხვა საკითხებთან ერთად, მათ შორის, განიხილავს დასაქმების ადგილზე სექსუალური შევიწროების შესაძლო შემთხვევებს და დარღვევის დადგენის შემთხვევაში რეკომენდაცია/წინადადებებით მიმართავს შესაბამის ორგანიზაციებს, იქნება ეს საჯარო ინსტიტუტები თუ კერძო კომპანიები. სახალხო დამცველის აპარატი სამუშაო ადგილზე სექსუალური შევიწროების საკითხებთან დაკაშირებით, ასევე ატარებს ცნობიერების ამაღლების ღონისძიებებს. აპარატს შემუშავებული აქვს სპეციალური ონლაინ კურსი, რომელიც მიზნად ისახავს, აამაღლოს ცნობიერება საჯარო სივრცეში და სამუშაო ადგილზე სექსუალური შევიწროების საკითხებზე, ასევე, გთავაზობთ გაეცნოთ ადამიანის უფლებების სამართლებრივ ჩარჩოს, რომელიც ემსახურება სექსუალური შევიწროების პრევენციას.” - აღნიშნა სახალხო დამცველის მოადგილემ, თამარ გვარამაძემ.
