სახალხო დამცველის აპარატმა, USAID  სამართლის უზენაესობის პროგრამის მხარდაჭერით, გამართა ღონისძიება, სადაც საქართველოს სახალხო დამცველმა, ნინო ლომჯარიამ, ისაუბრა ქვეყანაში არსებულ ადამიანის უფლებების გამოწვევებზე და ევროინტეგრაციის გზაზე სახალხო დამცველის როლზე.

ღონისძიებაზე 214 მონაწილე შეიკრიბა. მათ შორის იყვნენ საქართველოს აღმასრულებელი და საკანონმდებლო ხელისუფლების, დიპლომატიური მისიების, ადგილობრივი და საერთაშორისო ორგანიზაციებისა და მედიის წარმომადგენლები.

„მთავარი ღირებულება, რაც სახალხო დამცველის აპარატს ამოძრავებს, არის დამოუკიდებელი, დემოკრატიული და ძლიერი საქართველოს შენება. თითოეული ჩვენი ქმედება მიმართულია ადამიანის უფლებების დარღვევის აღმოფხვრისკენ და ყველასათვის თანაბარი შესაძლებლობების მინიჭებისკენ. ვამაყობ, რომ სახალხო დამცველის აპარატმა შეასრულა დაკისრებული როლი საქართველოს ევრო-ატლანტიკურ ინტეგრაციაში. ვიმედოვნებ, რომ მომავალი სახალხო დამცველი, გააგრძელებს ამ გზას, რადგან საქართველოში ყველა ადამიანს სჭირდება სახალხო დამცველი, მიუხედავად მისი ამჟამინდელი პოზიციისა თუ სამართლებრივი სტატუსისა.“ - განაცხადა საქართველოს სახალხო დამცველმა, ნინო ლომჯარიამ, ღონისძიების გახსნაზე მისასალმებელი სიტყვით გამოსვლისას.

საქართველოში ამერიკის შეერთებული შტატების ელჩმა კელი დეგნანმა, საქართველოში ევროკავშირის დელეგაციის ხელმძღვანელმა პაველ ჰერჩინსკიმ, საქართველოში გაეროს მუდმივმა კოორდინატორმა საბინე მახლმა და ევროპის საბჭოს ოფისის ხელმძღვანელმა საქართველოში ნატალია ვუტოვამ ისაუბრეს სახალხო დამცველისა და მისი აპარატის კონსტიტუციურ მოვალეობებზე, ასევე მისი ყოველდღიური საქმიანობის მნიშვნელობაზე. მათ მადლობა გადაუხადეს ქალბატონ ლომჯარიას ბოლო ხუთი წლის განმავლობაში გაწეული შრომისთვის და ხაზი გაუსვეს აპარატის თანამშრომელთა უზადო კვალიფიკაციას.

„სახალხო დამცველის აპარატი იყო შეერთებული შტატების დიდი ხნის პარტნიორი, მისი, როგორც დამოუკიდებელი ინსტიტუტის სტატუსის გამო, რომელიც ზედამხედველობას უწევს ფუნდამენტურ უფლებებს. სახალხო დამცველის აპარატის არაჩვეულებრივი გუნდი ყოველდღე მუშაობს იმისთვის, რომ საქართველოს თითოეულმა მოქალაქემ ისარგებლოს თავისი უფლებებით, რელიგიური თავისუფლებით, გენდერული თანასწორობითა და ეთნიკური და რელიგიური მრავალფეროვნების პატივისცემით.“ - განაცხადა საქართველოში ამერიკის შეერთებული შტატების ელჩმა კელი დეგნანმა.

ქალბატონი ლომჯარიას გამოსვლაში „ადამიანის უფლებების მიმართულებით არსებული გამოწვევები, მიღწევები და სამომავლო შესაძლებლობები ევროინტეგრაციის გზაზე“ სახალხო დამცველმა წარმოადგინა აპარატის ხუთწლიანი საქმიანობის ანგარიში, რომელშიც ასახულია ადამიანის უფლებათა დაცვის მიმართულებით მიღწეული შედეგები და სამომავლო რეკომენდაციები.

მონაწილეებმა ასევე სახალხო დამცველის აპარატის ბოლო ხუთი წლის მიღწევების შემაჯამებელი ვიდეო იხილეს. ვიდეოში სახალხო დამცველმა და მისმა მოადგილეებმა ისაუბრეს ადამიანის უფლებათა მიმართულებებზე, მთავარ გამოწვევებზე, მიღწევებზე, ინსტიტუტისადმი საზოგადოების დამოკიდებულებაზე, აპარატის როლსა და მნიშვნელობაზე. ვიდეოს გადაღება შესაძლებელი გახდა USAID სამართლის უზენაესობის პროგრამის მხარდაჭერით.