USAID სამართლის უზენაესობის პროგრამა მხარს უჭერს სახალხო დამცველის აპარატს სტრატეგიული სამართალწარმოების 2024-2025 წლების სამოქმედო გეგმის მომზადებაში.

20-21 ივნისს, პროგრამის მხარდაჭერის ფარგლებში ჩატარებულ შეხვედრას სახალხო დამცველის აპარატის ცხრამეტი თანამშრომელი დაესწრო. მონაწილეებმა სტრატეგიული სამართალწარმოების სამმართველოს მიმდინარე საქმეები განიხილეს და ახალ პრიორიტეტულ მიმართულებებზე იმსჯელეს. 

სამმართველოს ხელმძღვანელმა, მიხეილ შარაშიძემ, 2023 წლის სტრატეგიული სამართალწარმოების სამოქმედო გეგმის შესრულების შესახებ სიახლეები და აპარატის მიერ შეტანილი საჩივრების შესახებ ინფორმაცია წარმოადგინა. მომავალი სამოქმედო გეგმის ახალი პრიორიტეტული მიმართულებები მოიცავს სისხლის სამართლის მართლმსაჯულების და სამართლიანი სასამართლოს, თანასწორობის, შეზღუდული შესაძლებლობის მქონე პირების, ბავშვების და სოციალურ, სამოქალაქო და კულტურულ უფლებებთან დაკავშირებულ საქმეებს.

USAID კავკასიის დემოკრატიისა და მმართველობის ოფისის სამართლის უზენაესობის პროგრამის მენეჯმერმა, რუსუდან ტაბატაძემ, ხაზგასმით აღნიშნა, რომ სტრატეგიული სამართალწარმოების გაძლიერება USAID-ის ერთ-ერთ პრიორიტეტად რჩება. მან განაცხადა, რომ სახალხო დამცველის აპარატის სტრატეგიული სამართალწარმოების სამმართველო გადამწყვეტ როლს თამაშობს ადამიანების კონსტიტუციური უფლებების დაცვაში და რომ USAID-ი მხარს დაუჭერს აპარატს ამ მიმართულებით მანდატის გამოყენებაში.

შეხვედრას ესწრებოდნენ სახალხო დამცველის აპარატის სისხლის სამართლის, პრევენციის ეროვნული მექანიზმის, გენდერული თანასწორობის, შეზღუდული შესაძლებლობის მქონე პირთა უფლებების დაცვის, ბავშვის უფლებების, და სამოქალაქო, პოლიტიკური, ეკონომიკური და სოციალური და კულტურული უფლებების დაცვის დეპარტამენტების წარმომადგენლები. მონაწილეებმა განსაზღვრეს 20 შესაძლო თემატური საკითხი, რომლებიც მომავალ სამოქმედო გეგმაში აისახება.