USAID სამართლის უზენაესობის პროგრამა მხარს უჭერს საჯარო დისკუსიებს სასამართლო სისტემასთან დაკავშირებულ თემებზე.

2023 წლის 17 ოქტომბერს, პროგრამის მხარდაჭერით, ორგანიზაცია დემოკრატიის მცველებმა (DemDef) მართლმსაჯულების სისტემაში არსებულ გამოწვევებსა და შესაძლო გადაწყვეტებზე სტუდენტებისთვის დებატები გამართა. გიორგი მშვენიერაძემ, DemDef-ის წარმომადგენელმა და დავით ზედელაშვილმა Gnomon Wise-ის (საქართველოს უნივერსიტეტში დაფუძნებული დამოუკიდებელი კვლევითი ინსტიტუტი) მკვლევარმა საქართველოს უნივერსიტეტის 40-ზე მეტ სტუდენტს წარუდგინეს განსხვავებული შეხედულებები სასამართლო რეფორმის შესახებ.

გიორგი მშვენიერაძემ წარადგინა რეკომენდაციები, რომლებიც ასახულია DemDef-ისა და საქართველოს დემოკრატიული ინიციატივის მიერ შემუშავებულ დოკუმენტში „12 ნაბიჯი სამართლიანი სასამართლოსთვის.“ დოკუმენტი მოიცავს ისეთ საკითხებს, როგორიცაა იუსტიციის უმაღლესი საბჭოს რეფორმა, სასამართლოს თავმჯდომარეების არჩევა, მოსამართლეების მივლინება, სასამართლოს სპეციალიზაციები, დისციპლინური სამართალწარმოება, საქმეების განაწილება, ნაფიც მსაჯულთა სასამართლო, ადმინისტრაციულ სამართალდარღვევათა კოდექსის რეფორმა და სასამართლოს დატვირთულობა. აღინიშნა, რომ შემოთავაზებული ცვლილებები არ საჭიროებს საკონსტიტუციო ცვლილებებს.

დავით ზედელაშვილმა მართლმსაჯულების სისტემაში არსებული ძირითადი პრობლემები მიმოიხილა. მისი მოსაზრებით, სასამართლო სისტემაში ძალაუფლების დეცენტრალიზაცია ფუნდამენტური რეფორმის უპირველესი მიზანი უნდა იყოს.

პრეზენტაცია კითხვა-პასუხის რეჟიმში გაგრძელდა. საუბარი შეეხო იუსტიციის უმაღლესი საბჭოს როლსა და ფუნქციებს, ნაფიც მსაჯულთა მიერ განსახილველი საქმეების დივერსიფიკაციას და სასამართლო რეფორმებს საქართველოს ევროკავშირში ინტეგრაციის კონტექსტში.

ეს იყო მეოთხე დისკუსია დემოკრატიის მცველების მიერ ორგანიზებული დებატების სერიიდან, რომელიც USAID სამართლის უზენაესობის პროგრამის მხარდაჭერით ხორციელდება. პროექტი ხელს უწყობს საჯარო დისკუსიას საქართველოში სასამართლო სისტემის შესახებ. პროექტის მსვლელობისას სტუდენტებისთვის რვა მსგავსი ღონისძიება გაიმართება თბილისში, ქუთაისსა და ბათუმში.