2023 წლის 17 ივნისს, USAID სამართლის უზენაესობის პროგრამის მხარდაჭერით თბილისში გაიმართა სემინარი მოსამართლეებისთვის, სასამართლო დარბაზში ქალებთან ეფექტური კომუნიკაციის შესახებ. სემინარს ესწრებოდა 14 ქალი მოსამართლე სამართლის უზენაესობის პრაქტიკის ჯგუფებიდან, მათ შორის ქალთა უფლებების პრაქტიკის წევრები.

სემინარს უძღვებოდა ექსპერტი ფსიქოლოგი ეკატერინე (ქეთი) თავართქილაძე, რომელმაც სასამართლო დარბაზში მყოფი ქალებისა და მოსამართლეების წინაშე არსებული უნიკალური გამოწვევები განიხილა. მან ისაუბრა ქალთა უფლებების დაცვის მნიშვნელობაზე სასამართლო პროცესის განმავლობაში, მათ შორის მათი თანასწორობის უფლების უზუნველყოფის, მოწინააღმდეგე მხარის მხრიდან უთანასწორო მოპყრობაზე რეაგირებისა და მართლმსაჯულებაზე ხელმისაწვდომობის უფლების ჩათვლით.

განსაკუთრებული ყურადღება გამახვილდა კონკრეტულ გამოწვევებზე, რომლებსაც მოსამართლეები აწყდებიან ოჯახში ძალადობის მსხვერპლებთან, ეთნიკური და რელიგიური უმცირესობების წარმომადგენლებთან და სხვა მარგინალიზებულ ჯგუფებთან ურთიერთობისას. ტრენერმა ხაზი გაუსვა ტრავმის შესახებ ინფორმირებული მიდგომის და პატივისცემის გამომხატველი და ინკლუზიური ენის გამოყენების მნიშვნელობასაც.

შეხვედრაზე ასევე აღინიშნა, რომ სახელმწიფოს მიერ დაფინანსებული სერვისების ნაკლებობა, როგორიცაა ფსიქოლოგებთან ხელმისაწვდომობა, მნიშვნელოვან გამოწვევას წარმოადგენს, რადგან ბევრ ქალს არ შეუძლია ასეთი სერვისების მიღება და სასამართლოები ვერ ავალდებულებენ მხარეებს თერაპია საკუთარი ხარჯით გაიარონ.

შეხვედრაზე მოსამართლეებმა განიხილეს სასამართლო პროცესში ჩართულ მხარეებთან კომუნიკაციის ეფექტური სტრატეგიები, ხაზი გაუსვეს მოსამართლის მხრიდან მოთმინების, არაგამკიცხავი დამოკიდებულების და ღიაობის ჩვენების მნიშვნელობას. მათ ასევე ისაუბრეს საკუთარ თავში მიკერძოების ამოცნობისა და მასთან გამკლავების მნიშვნელობასა და მხარეთა კულტურული მიკუთვნებულობის მიმართ მგრძნობიარე მიდგომის აუცილებლობაზეც.

სემინარმა მოსამართლეებს შესაძლებლობა მისცა, კიდევ ერთხელ გაეაზრებინათ სასამართლო დარბაზში ქალებთან კომუნიკაციის გამოწვევები და შეემუშავებინათ მიდგომები ამ სირთულეების დასაძლევად.