თბილისის საქალაქო სასამართლოსა და რუსთავის საქალაქო სასამართლოს მოსამართლეებმა მონაწილეობა მიიღეს პროცესის გაჭიანურების შემცირებასთან დაკავშირებით გამართულ სამუშაო შეხვედრაში, რომელიც USAID სამართლის უზენაესობის პროგრამის ფარგლებში ჩატარდა. მოსამართლე ჯოზეფ ბელიპანი, რომელიც ადრე კოლორადოს შტატის საპროცესო მოსამართლედ მუშაობდა, და მისი თანაშემწე, თამთა ჯღარკავა, უძღვებოდნენ საინფორმაციო სესიას პროცესის გადადების შემცირების ინსტრუმენტების შესახებ.

სამუშაო შეხვედრის დროს, თბილისის საქალაქო სასამართლოსა და რუსთავის საქალაქო სასამართლოს მოსამართლეები დაიყვნენ მცირე ჯგუფებად, სადაც გონებრივი იერიშის სავარჯიშოების შედეგად მოქმედი კანონმდებლობის ფარგლებში სხვადასხვა გზები შეიმუშავეს პროცესის გაჭიანურების მიზეზების აღმოსაფხვრელად.

მოსამართლე ბელიპანიმ აღნიშნა, რომ „მოსამართლეობა ხელოვნებაა და არა მეცნიერება“, და საჭიროა კონკრეტულ საკითხზე არა მეტი დროის დახარჯვა, არამედ დროის უფრო ეფექტიანად გამოყენება. მან ასევე ხაზი გაუსვა ფაქტს, რომ მოსამართლეებს შეუძლიათ გამონახონ კრეატიული გზები არსებული საკანონმდებლო ჩარჩოს ფარგლებში საკითხის მოსაგვარებლად და რომ არ არსებობს კონკრეტული მითითებები/წესები, თუ რა ნაბიჯები უნდა გადადგას თითოეულმა მოსამართლემ აღნიშნულთან მიმართებით.

სემინარის ჩატარებამდე, მოსამართლე ბელიპანი 180-ზე მეტ სასამართლო სხდომას დაესწრო თბილისის საქალაქო სასამართლოში და უშუალოდ გაეცნო ქართველი მოსამართლეების სამუშაო დღეს. მან ასევე შეისწავლა ევროსაბჭოს ანგარიშებში წარმოდგენილი სტატისტიკა პროცესების გაჭიანურების შესახებ და ისინი სამუშაო შეხვედრაზე განხილულ ქართულ პრაქტიკას შეადარა.

მონაწილეების თქმით, სესიამ ნაყოფიერად ჩაიარა და ბევრმა მათგანმა გამოთქვა სურვილი სამუშაო შეხვედრის დროს განხილული ზოგიერთი მაგალითი საკუთარ პრაქტიკაში გამოიყენონ. ქართველმა მოსამართლეებმა ერთმანეთს გაუზიარეს გამოცდილება და ახალ-ახალი იდეები მიაწოდეს ერთმანეთს. მონაწილეთა ერთ-ერთი იდეა იყო თანამედროვე ტექნოლოგიების მაქსიმალურად გამოყენება, სარჩელის შეტანიდან საბოლოო გადაწყვეტილების მიღებამდე.