2023 წლის 16 მარტს, USAID სამართლის უზენაესობის პროგრამამ (პროგრამა) გამართა სამუშაო შეხვედრა უნივერსიტეტის სამართლის პროფესორებისთვის საზოგადოებაზე ორიენტირებული მართლმსაჯულების (PCJ) და საზოგადოებრივი ჩართულობის შესახებ, რომელსაც ესწრებოდა 15 სხვადასხვა უნივერსიტეტის 20 აკადემიური პერსონალი, მათ შორის 5 რეგიონული უნივერსიტეტის თანამშრომლები.

პროგრამის ხელმძღვანელი გიორგი ჩხეიძე მიესალმა მონაწილეებს და ხაზი გაუსვა პროგრამის მზაობას ხელი შეუწყოს მართლმსაჯულების სისტემასა და აკადემიას შორის ჩართულობას საგრანტო დაფინანსების გზით, საგანმანათლებლო პროექტებით და ცნობიერების ამაღლების ინიციატივებით PCJ-ის სფეროში.

პირველი სესიის განმავლობაში, პროგრამის საზოგადოებრივი ჩართულობის მრჩეველმა დოქტორმა თიმ ბუნიევაცმა წაიკითხა ლექცია, რომელიც მიზნად ისახავდა PCJ-ის პრინციპებისა და სასამართლოსა და საზოგადოებას შორის ჩართულობის გლობალური პრაქტიკის მაგალითების გაცნობას. დოქტორმა ბუნიევაცმა განმარტა შესაბამისი თეორიები და დიზაინის მიდგომები და განიხილა მართლმსაჯულების სისტემის ადგილობრივ თემებთან ურთიერთთანამშრომლობის გაძლიერების სტრატეგიები. მან განიხილა განსხვავებები ტრადიციულ და პრობლემების გადამჭრელ სასამართლოებს შორის, სასამართლოსა და საზოგადოებას შორის ჩართულობის გაფართოების პოტენციური გზები სასამართლო შენობების საზღვრებს მიღმა და სხვადასხვა გარე დაინტერესებული მხარეების ჩართვის შესაძლებლობები სასამართლო-საზოგადოების ჩართულობის მხარდასაჭერად. მან ისაუბრა სასამართლო დარბაზის დიზაინზე, რომელიც მოიცავს PCJ პრინციპების დანერგვას სასამართლოს მოწყვლადი მომხმარებლებისთვის, როგორიცაა ბავშვები ან მენტალური პრობლემების მქონე პირები. მან მოიყვანა საინფორმაციო ინიციატივების წარმატებული მაგალითები, რომლებიც ხელს უწყობს საზოგადოებისმართლმსაჯულების სისტემის მიმართ ნდობის გაზრდას.

სესიაზე აკადემიის წარმომადგენლები აქტიურად მონაწილეობდნენ დისკუსიებში და სვამდნენ კითხვებს. მათ გამოთქვეს ინტერესი უფრო აქტიურად ჩაერთონ საქართველოში PCJ-ის შესახებ ცნობიერების ამაღლებაში.

ღონისძიების მეორე ნაწილი მოიცავდა პრაქტიკულ სემინარს, სადაც მონაწილეებმა ისაუბრეს PCJ თეორიისა და დიზაინის მიდგომების ჩართვის გზებზე საქართველოს უნივერსიტეტების მიერ შეთავაზებულ საგანმანათლებლო პროგრამებში. მათ შეიმუშავეს ოთხი განსხვავებული მეთოდი PCJ-ის სწავლების პრაქტიკაში ინტეგრირებისთვის: 1) დამოუკიდებელი PCJ კურსის შექმნა; 2) ინტენსიური PCJ კურსის შემუშავება; 3) არსებული კურსების PCJ მოდულებით გამდიდრება; და 4) PCJ ელემენტების ჩართვა კლინიკურ და ე.წ. „street law” პროგრამებში, რომელიც უკვე შემოთავაზებულია სხვადასხვა უნივერსიტეტებში. მათ განსაზღვრეს დეტალური მიდგომები თითოეული სწავლების მეთოდისთვის და შეიმუშავეს გადაჭრის გზები, რათა აკადემიური პროცესი მართლმსაჯულების სექტორთან მიმართებაში უფრო პრაქტიკული გახდეს.

ამასთანავე, მათ განიხილეს სტრატეგიები იმის უზრუნველსაყოფად, რომ ქართულმა აკადემიურმა სექტორმა PCJ მიდგომის გათვალისწინებით განაგრძოს საქმიანობა და გააზიარეს ახალი საპროექტო იდეები პროგრამის მხარდაჭერით ამ კონცეფციის შემდგომი გავრცელების მიზნით.