ახალციხის რაიონული სასამართლოს თანამშრომლებმა, მათ შორის მოსამართლეებმა, მონაწილეობა მიიღეს USAID სამართლის უზენაესობის პროგრამის სემინარში, რომელიც სასამართლოსა და საზოგადოების ჩართულობას ეხებოდა.

პროგრამის მრჩეველმა საზოგადოების ჩართულობის საკითხებში, ტიმ ბუნიევაცმა და კოორდინატორმა საზოგადოების ჩართულობის საკითხებში, მარიამ გობრონიძემ გამართეს სესია სასამართლო-საზოგადოების ჩართულობის პრაქტიკის შესახებ სხვადასხვა ქვეყნების მაგალითზე.

ბუნიევაცი შეეხო საზოგადოებაზე ორიენტირებულ მართლმსაჯულებასთან დაკავშირებულ ზოგად საკითხებს, მათ შორის იმსჯელა დარგში არსებულ მნიშვნელოვან თეორიასა და პრაქტიკულ მიდგომებზე და განიხილა სტრატეგიები, რომლებიც ხელს შეუწყობს სასამართლოს ჩართულობას სხვადასხვა ნიშნით განსხვავებულ საზოგადოებრივ ჯგუფებში.

სესიის დროს მიმოიხილეს ისეთი თემები, როგორიცაა: განსხვავებები ტრადიციულ და პრობლემის გადაჭრაზე ორიენტირებულ სასამართლოებს შორის; სასამართლოში საზოგადოებაზე ორიენტირებული მიდგომის ხუთი საშუალება; სასამართლოსა და საზოგადოების ჩართულობის გაზრდის შესაძლებლობა სასამართლო შენობის გარეთ; კვლევის ანგარიშის წარმოების მაგალითები; სასამართლოსა და საზოგადოების ჩართულობის მრჩეველთა გუნდის როლი და ფუნქციები; და სასამართლო-საზოგადოების ჩართულობის მხარდასაჭერად მრავალი გარე დაინტერესებული მხარეების ჩართვის შესაძლებლობები.

ჯგუფური სავარჯიშოების საშუალებით მონაწილეებს ჰქონდათ საშუალება ესაუბრათ ახალციხელების წინაშე მდგარი სამართლებრივი საჭიროების შესახებ, რის შემდეგ, ინტერაქტიური დისკუსიის მეშვეობით სასამართლო-საზოგადოების ჩართულობის წარმატებული გეგმის ელემენტების იდენტიფიცირებაზე იმსჯელეს. შეხვედრა დასრულდა პრაქტიკული სავარჯიშოებით, სასამართლოს მოსამართლეებისა და თანამშრომლების მიერ სასამართლო-საზოგადოების ჩართულობის საკუთარი გეგმის შემუშავებით, რომელიც შექმნილია წინასწარ იდენტიფიცირებული საზოგადოების საჭიროებების დასაკმაყოფილებლად და სასამართლოს ჩართულობის გაზრდის მიზნით ადგილობრივ თემთან. გეგმა მოიცავს სასამართლოს სამოქმედო მისიას, სასურველ შედეგებს და აქტივობებს წინასწარ იდენტიფიცირებული საზოგადოების ჯგუფის საჭიროებების დასაკმაყოფილებლად, ასევე ძირითად რესურსებსა და დაინტერესებულ პირთა მხარდაჭერას, რომელიც საჭირო იქნება შემოთავაზებული აქტივობების განსახორციელებლად. სემინარის მონაწილეებმა საზოგადოების ჩართულობის აქტივობების მრავალი ფორმა შეიმუშავეს, როგორიცაა მრგვალი მაგიდის დისკუსიები სხვა დაინტერესებულ მხარეებთან, ღია კარის დღეები სასამართლოში, იმიტირებული სასამართლო პროცესები, პარტნიორობა საგანმანათლებლო დაწესებულებებთან, სამართლებრივ ჭრილში ცნობიერების ამაღლების აქტივობების მომზადება და ა.შ., რომელთა განხორციელებასაც სასამართლო მომდევნო 24 თვის განმავლობაში განიხილავს. მონაწილეებმა პროგრამის გუნდი 2023 წლის აპრილში სასამართლოში მიიწვიეს სასამართლო-საზოგადოების ჩართულობის გეგმის დასასრულებლად, სამუშაო შეხვედრაზე მომზადებული გეგმის პროექტის საფუძველზე.

მონაწილეებმა მადლობა გადაუხადეს პროგრამას მხარდაჭერისთვის. მოსამართლეებმა მარიკა ჩიტაშვილმა და გიორგი ლობჟანიძემ ხაზი გაუსვეს სასამართლო-საზოგადოების ჩართულობის მნიშვნელობას სასამართლოს მიმართ საზოგადოების ნდობისა და მისი ლეგიტიმაციის გაზრდის საკითხში.

„სემინარზე განხილული ყველა საკითხი ძალიან მნიშვნელოვანია სასამართლოს ეფექტური ფუნქციონირებისთვის. ძალიან საინტერესო იყო წარმატებული პრაქტიკის მოსმენა მთელი მსოფლიოდან, განსაკუთრებით ავსტრალიის მაგალითები. USAID სამართლის უზენაესობის პროგრამის მხარდაჭერით ჩვენი სასამართლო მომავალში კიდევ უფრო მეტად იქნება საზოგადოებაზე ორიენტირებული და შეეცდება აამაღლოს სამართლებრივი ცნობიერება კონკრეტულ ჯგუფებში.“ - განაცხადა ნინო ჩიგოგამ, ახალციხის რაიონული სასამართლოს მენეჯერმა.

სამართლის უზენაესობის პროგრამა გააგრძელებს ახალციხის რაიონული სასამართლოს მხარდაჭერას, რათა გააღრმაოს მისი აქტივობები და დაეხმაროს მას სასამართლო-საზოგადოების ჩართულობის ყოვლისმომცველი გეგმის შემუშავებაში მოსამართლეებისა და სასამართლოს პერსონალის აქტიური ჩართულობით.