USAID სამართლის უზენაესობის პროგრამა მხარს უჭერს საგანმანათლებლო ატივობებს რომელიც ხელს უწყობს სასამართლოსა და საზოგადოებას შორის ჩართულობის გაძლიერებას. 3 ნოემბერს, პროგრამის მხარდაჭერით და მედია სააგენტო ქუთაისი პოსტის ორგანიზებით, ზესტაფონის რაიონულ სასამართლოში მოსწავლეების ტური გაიმართა. ვიზიტის ფარგლებში, ზესტაფონის პირველი საჯარო სკოლისა და მომავლის სკოლის 33 მოსწავლე გაეცნო სასამართლოს მუშაობის პრინციპებს.

სტუმრებს სასამართლოს მენეჯერმა, ნინო გელაშვილმა უმასპინძლა და დეტალურად განუმარტა საერთო სასამართლოების სისტემა, ესაუბრა საქმის განხილვის წესებისა და სასამართლო სხდომის მიმდინარეობის შესახებ.

მოსწავლეებმა დაათვალიერეს როგორც სისხლის, ასევე სამოქალაქო საქმეთა განხილვის სხდომათა დარბაზები. ახალგაზრდებს ასევე, საშუალება ჰქონდათ მოერგოთ მოსამართლის, პროკურორის, მხარეების წარმომადგენლების როლი, რაც მათთვის განსაკუთრებით საინტერესო აღმოჩნდა.

„აქამდე არანაირი ინფორმაცია არ მქონდა სასამართლოს შესახებ, თუ რა ხდებოდა შიგნით. ამიტომ, მრავლისმომცემი იყო ეს შეხვედრა, მომეწონა და აღფროვანებული ვარ. შესაძლოა, დავფიქრდე კიდეც სამომავლოდ ამ პროფესიის არჩევაზე“- განაცხადა ზესტაფონის მომავლის სკოლის“ მოსწავლემ, ქეთევან მაღლაკელიძემ.

სასწავლო ვიზიტების მნიშვნელობაზე და მათ როლზე არაფორმალურ განათლებაში ისაუბრეს მასწავლებლებმაც. ზესტაფონის პირველი საჯარო სკოლის ისტორიისა და სამოქალაქოს მასწავლებლის სოფიო ობოლაძის თქმით: „ჩემთვის ძალიან საინტერესო იყო ეს ვიზიტი. სკოლისთვის პრიორიტეტია არაფორმალურ განათლება და აქ მიღებული ცოდნა მოსწავლეებისათვის ნაყოფიერი იქნება. ასეთმა აქტივობებმა შესაძლებელია, მათ პროფესიულ არჩევანზეც იქონიოს გავლენა. დიდი მადლობა ორგანიზატორებს ასეთი საინტერესო ღონისძიებისთვის.“

ღონისძიება ქუთაისი პოსტის პროექტის ფარგლებში გაიმართა, რომელიც USAID სამართლის უზენაესობის მხარდაჭერით ხორციელდება. პროექტი მიზნად ისახავს საზოგადოების ინფორმირებას სასამართლო სისტემასთან დაკავშირებული საკითხებისა და მიმდინარე რეფორმების შესახებ სხვადასხვა საკომუნიკაციო არხების გამოყენებით. ქუთაისი პოსტი იმერეთის რეგიონის სასამართლოებში კიდევ სამი ტურის მოწყობას გეგმავს.