USAID სამართლის უზენაესობის პროგრამა აგრძელებს საქართველოს იურიდიული დახმარების სამსახურის (LAS) მხარდაჭერას საინფორმაციო კამპანიაში - ვაქციოთ კანონი ყველასათვის ხელმისაწვდომი: პარალეგალების ინიციატივა და კარიერული საუბრები აჭარის რეგიონის სტუდენტებისთვის.

2023 წლის 10-13 თებერვალს, ოცდაორმა სტუდენტ-პარალეგალმა გაიარა ტრენინგი კომუნიკაციის, საჯარო გამოსვლის, არავერბალური კომუნიკაციისა და პრეზენტაციის საკითხებში.

ექსპერტი/ტრენერი, ვლადიმერ მკერვალიშვილი დაეხმარა სტუდენტებს თვითპრეზენტაციის უნარების გაუმჯობესებაში, რათა მათ სათანადოდ მოახდინონ ადამიანის უფლებების შესახებ საუბარი/ქარდგენა აჭარის რეგიონში ადგილობრივ მოსახლეობასთან საინფორმაციო შეხვედრების დროს.

სტუდენტ-პარალეგალებს, ასევე, მიეცათ შესაძლებლობა გაეღრმავებინათ ცოდნა ადამიანის ძირითადი უფლებების შესახებ, რომლის შესახებ სასაუბროდაც მოწვეული იყო საქართველოს სახალხო დამცველის მოადგილე, გიორგი ბურჯანაძე.

მან განიხილა შემდეგი თემები: საქართველოში ადამიანის უფლებების ისტორია და კონსტიტუცია, ადამიანის უფლებების კლასიფიკაცია და ადამიანის უფლებების დაცვის სამართლებრივი მექანიზმები, სიცოცხლის უფლება, წამებისა და დისკრიმინაციის აკრძალვა, გამოხატვის და ინფორმაციის თავისუფლება.

გარდა ამისა, გიორგი ბურჯანაძემ და იურიდიული დახმარების სამსახურის დირექტორმა, რაჟდენ კუპრაშვილმა ცოდნის გაღრმავების მიზნით მონაწილეებთან ადვოკატისა და უფლებადამცველის პროფესიის შესახებ კარიერული საუბრები გამართეს, ასევე აღნიშნული პროფესიის წარმომადგენლების წინაშე მდგარი რეალური გამოწვევები განიხილეს.

„USAID სამართლის უზენაესობის პროგრამა მხარს უჭერს იურიდიული დახმარების სამსახურს, რათა გაიზარდოს საზოგადოების ინფორმირებულობა მათი უფლებების და ამ უფლებების დაცვის მექანიზმების შესახებ. პარალეგალების პროექტის კურსდამთავრებულები, თავიანთი ცოდნის საზოგადოებისთვის გაზიარებით, გარდამტეხ როლს ასრულებენ აღნიშნულ პროცესში.“ - აღნიშნა თავის მისასალმებელ სიტყვაში ირინა ლორთქიფანიძემ, USAID სამართლის უზენაესობის პროგრამის რეგიონული ჰაბის მრჩეველმა.

ტრენინგის დასასრულს სტუდენტებს გადაეცათ პროექტში მონაწილეობის სერტიფიკატები. სტუდენტ-პარალეგალთა მეორე ჯგუფის საინფორმაციო აქტივობები 2022 წლის ოქტომბრიდან 2023 წლის თებერვლამდე გრძელდებოდა.

ღია კონკურსის წესით 40 აპლიკანტიდან 18 საუკეთესო სტუდენტი შეირჩა აჭარის ადგილობრივი უნივერსიტეტებიდან. პროგრამა მოიცავდა თეორიულ და პრაქტიკულ მოდულებს ქალთა უფლებებზე, ბავშვის საუკეთესო ინტერესზე, ტრეფიკინგზე, შშმ პირთა უფლებებზე, ადამიანის ძირითად უფლებებზე, ეფექტურ კომუნიკაციასა და თვითპრეზენტაციაზე. პროგრამის ფარგლებში ასევე ჩატარდა იმიტირებული სასამართლო პროცესი ბავშვის საუკეთესო ინტერესებზე.