USAID სამართლის უზენაესობის პროგრამამ გამართა საინფორმაციო შეხვედრა, რომელმაც სტუდენტებს საშუალება მისცა შეხვედროდნენ მოსამართლეებს, ქეთევან მამაცაშვილს (თბილისის საქალაქო სასამართლო), ხატია არდაზიშვილს (თბილისის სააპელაციო სასამართლო) და ბადრი ნიპარიშვილს (თეთრიწყაროს რაიონული სასამართლო), საქართველოში ქალთა უფლებებთან დაკავშირებულ  სასამართლო პრაქტიკაზე  სასაუბროდ.

გრიგოლ რობაქიძის უნივერსიტეტის მასპინძლობით ჩატარებულმა შეხვედრამ საშუალება მისცა ოთხმოცდაათზე მეტ სტუდენტს, მოესმინათ მოსამართლეებისათვის  ისეთ თემებზე, როგორიცაა: შემაკავებელი ორდერები, გენდერული სტერეოტიპები და გენდერული მიკერძოება და მათზე რეაგირების უნარი; საკუთარი მიკერძოების პერიოდული შემოწმების მნიშვნელობა; ქალთა ფინანსური რესურსები და ქონებრივი უფლებები.

სტუდენტებს მისასალმებელი სიტყვით მიმართეს გრიგოლ რობაქიძის უნივერსიტეტის რექტორმა მამუკა თავხელიძემ და USAID სამართლის უზენაესობის პროგრამის ხელმძღვანელმა გიორგი ჩხეიძემ.

სტუდენტებთან მისასალმებელ სიტყვაში რექტორმა ხაზი გაუსვა ამ ტიპის დისკუსიის მნიშვნელობას, რადგან ის ეხმარება სტუდენტებს შეიძინონ დამატებითი უნარები და ცოდნა, რაც ძალიან გამოადგებათ იურიდიულ კარიერაში შესვლისას. მან დაადასტურა უნივერსიტეტის სურვილი განაგრძოს პარტნიორობა USAID სამართლის უზენაესობის პროგრამასთან სხვადასხვა აქტივობების განხორციელების მიმართულებით.

„ასეთი ინფორმაციული შეხვედრები სტუდენტებს აძლევს შესაძლებლობას დასვან კითხვები და მოისმინონ მოსამართლეთა პასუხები მათთვის საინტერესო თემებზე. როდესაც მე ვიყავი სტუდენტი, ასეთი ღონისძიებების შესაძლებლობა არ მქონდა. დღეს ჩვენი პროგრამა, უნივერსიტეტები და მოსამართლეები, ყველანი ვცდილობთ მივაწოდოთ რაც შეიძლება მეტი ინფორმაცია და გავმართოთ მრავალი ღონისძიება, რაც მნიშვნელოვანი იქნება სტუდენტების განვითარებისა და მათი პროფესიული ცოდნის შესაძენად.“ - განაცხადა გიორგი ჩხეიძემ, სტუდენტებისთვის მიცემულ ინტერვიუში.

დისკუსია ორ საათზე მეტხანს გაგრძელდა, რამაც სტუდენტებს საშუალება მისცა სიღრმისეულად განეხილათ საზოგადოებაში არსებული გენდერული სტერეოტიპები და მათი ფესვები, ქალების ფინანსური დამოუკიდებლობის მნიშვნელობა და ოჯახში ძალადობის საკითხები, მათ შორის ეფექტურია თუ არა შემაკავებელი ორდერები ქალთა მიმართ ძალადობისა და მათი პრევენციისთვის.