მედიატორთა ეთიკის შესახებ განგრძობადი პროფესიული განვითარების კურსი მედიაციის ეთიკური სტანდარტების გაძლიერებასა და ამ ინსტიტუტის სანდოობის განმტკიცებას ემსახურება. იგი მიზნად ისახავს პროფესიაში ერთიანი ქცევის სტანდარტების დამკვიდრებას.

2023 წლის 18-19 ოქტომბერს, USAID სამართლის უზენაესობის პროგრამის მხარდაჭერით,  თხუთმეტმა მედიატორმა თბილისიდან, მცხეთიდან, რუსთავიდან, გურჯაანიდან, ქუთაისიდან და თელავიდან, მონაწილეობა მიიღეს მედიატორთა ეთიკის საკითხებზე ტრენინგში, რომელიც საქართველოს მედიატორთა ასოციაციის ორგანიზებით ჩატარდა.

ეთიკის საკითხებზე ტრენინგი საქართველოს მედიატორთა ასოციაციის განგრძობადი პროფესიული განვითარების პროგრამის ნაწილია, რომელიც USAID-ის პროექტის „კანონის უზენაესობის მხარდაჭერა საქართველოში“ (PROLoG) მხარდაჭერით იქნა შემუშავებული. იგი სავალდებულოა ყველა მედიატორისათვის. ტრენინგს უძღვებოდნენ ნათია ჩიტაშვილი, მედიატორი და საქართველოს მედიატორთა ასოციაციის საბჭოს წევრი და ირაკლი ყანდაშვილი, საქართველოს მედიატორთა ასოციაციის თავმჯდომარე.

კურსის მიმდინარეობისას ტრენერებმა მიმოიხილეს ეთიკის ფუნდამენტური პრინციპები, რომლებიც საქართველოში მედიაციის პრაქტიკაზე ვრცელდება, ისაუბრეს ეთიკის მნიშვნელობაზე მედიაციის პროცესში, მონაწილეებს გაუზიარეს ეთიკური დილემების გადაჭრის სტრატეგიები და რეკომენდაციები.

ტრენინგის მიმდინარეობისას ჩატარდა ჯგუფური სამუშაოები, სადაც განიხილეს ეთიკური პრობლემებისა და დილემების კონკრეტული შემთხვევები. მაგალითად: როგორ უნდა შეინარჩუნოს მედიატორმა პროცესის კონფიდენციალურობა, როგორ უნდა მოიქცეს იგი მეორე მხარისთვის ინფორმაციის გამჟღავნებისას, რათა უზრუნველყოს დამოუკიდებლობის დაცვა და მიუკერძოებლობის შენარჩუნება; როგორ უნდა უზრუნველყოს მედიატორმა თითოეულის მხარის ნებაყოფლობითი მონაწილეობა, საქმიანობა განახორციელოს სამართლიანობის, თანასწორუფლებიანობის, ანგარიშვალდებულების პრინციპების დაცვით; როგორ უნდა მოახდინოს მხარეთა რეალური ინტერესების კეთილსინდისიერად დადგენა.

ღონისძიება USAID სამართლის უზენაესობის პროგრამის მიერ საქართველოს მედიატორთა ასოციაციაზე გაცემული 18-თვიანი გრანტის ფარგლებში ჩატარდა, რომელიც მიზნად ისახავს მედიაციის შესახებ კანონმდებლობის დახვეწას, გამოცდილების გაზიარებას, მედიატორთა განგრძობადი პროფესიული განვითარებას, ასევე სასამართლო მედიაციის მხარდაჭერას.