მარნეულში, ორგანიზაციამ პრევენცია პროგრესისთვის (PFP) ადგილობრივ სამოქალაქო საზოგადოების ორგანიზაციის სამოქალაქო ჩართულობისა და აქტივიზმის ცენტრთან ერთად, ქვემო ქართლის რეგიონში სასამართლო სერვისების ხელმისაწვდომობის შესახებ დისკუსია გამართა.

შეხვედრას 21 მონაწილე ესწრებოდა. მათ შორის, სახალხო დამცველის აპარატის, არასამთავრობო ორგანიზაციების, ადგილობრივი პოლიტიკური პარტიების წარმომადგენლები და აქტივისტები.

სახალხო დამცველის აპარატის წარმომადგენელმა, მარიამ ორჟონიამ, ადგილობრივ დონეზე სასამართლოს ხელმისაწვდომობის პრობლემებზე ისაუბრა და ხაზი გაუსვა იმ სირთულეებს, რომელიც ენობრივი ბარიერის დაძლევასთან არის დაკავშირებული. მარიამ ორჟონიამ ასევე, ისაუბრა სამოქალაქო თანასწორობისა და ინტეგრაციის სახელმწიფო სტრატეგაზე და აღნიშნა, რომ სტრატეგიის დოკუმენტში, სამწუხაროდ,  ეთნიკური უმცირესობებისთვის სასამართლოს ხელმისაწვდომობის კუთხით არსებული საჭიროებები ცალკე არ არის გამოყოფილი.

შეხვედრის მონაწილეებმა ისაუბრეს რეგიონში ქართული ენის სწავლების დონის ამაღლების აუცილებლობაზე და ხაზი გაუსვეს სასამართლო ფორმებისა და სხვა დოკუმენტების უმცირესობათა ენებზე თარგმნის მნიშვნელობას. დასახელდა შემთხვევები, როდესაც ფიზიკურმა პირებს მნიშვნელოვანი ქონებრივი ზარალი მიადგათ ენობრივი ბარიერისა და თარჯიმნის სერვისის ნაკლებობის გამო.

შეხვედრა ადგილობრივმა მედიებმა, რადიო მარნეულმა და 24news.ge გააშუქეს. დისკუსია USAID სამართლის უზენაესობის პროგრამის მხარდაჭერით გაიმართა და მარნეულისა და ბოლნისის მუნიციპალიტეტებში მცხოვრები ეთნიკური უმცირესობის წარმომადგენლებისთვის მართლმსაჯულების ხელმისაწვდომობის გაუმჯობესებას ისახავს მიზნად.