თბილისში გაიმართა USAID სამართლის უზენაესობის პროგრამის ქალთა უფლებებისა და გამოხატვის თავისუფლების პრაქტიკის ჯგუფების ერთობლივი შეხვედრა სასამართლოში საქმის განხილვის დროს გენდერული სტერეოტიპების, მათი გავლენის და სექსისტურ გამოხატვაზე რეაგირების ღონისძიებების შესახებ.

შეხვედრის დროს USAID სამართლის უზენაესობის პროგრამის ხელმძღვანელის მოადგილემ, ნილ ვაინსტაინმა ხაზი გაუსვა გენდერული სტერეოტიპების იდენტიფიცირებისა და აღმოფხვრის მნიშვნელობას სასამართლო დარბაზში ქალებისთვის თანასწოროუფლებიანობის უზრუნველყოფისა და მათთვის სასამართლოს ხელმისაწვდომობის გაზრდის საქმეში.

შეხვედრას 12 მოსამართლე ესწრებოდა, რომლებმაც იმსჯელეს გენდერული სტერეოტიპების და გენდერული სტერეოტიპირების რაობაზე, მათი იდენტიფიცირების გზებზე და მათთან დაკავშირებით არსებულ საერთაშორისო სტანდარტებზე.

„გენდერული სტერეოტიპირება ქალთა მიმართ დისკრიმინაციის მიზეზია და თავად წარმოადგენს დისკრიმინაციას“ - აღნიშნა ადამიანის უფლებათა ექსპერტმა, ქეით ლევინმა (European Human Rights Advocacy Center (EHRAC)) გაეროს ქალთა მიმართ დისკრიმინაციის აღმოფხვრის კომიტეტის (UN CEDAW) შესაბამისი გადაწყვეტილებების ანალიზის დროს.  

დისკრიმინაციის აკრძალვის სამართლის ფარგლებში საკითხის გაანალიზებისას  განიხილეს აგრეთვე ადამიანის უფლებათა ევროპული სასამართლოს პრაქტიკა და ხაზი გაუსვეს იმ თავისებურებებს, რაც ახასიათებს გენდერულ სტერეოტიპებზე სასამართლოს მსჯელობას, დისკრიმინაციის სხვა შემთხვევებისგან განსხვავებით.

შეხვედრაზე მონაწილე მოსამართლეებმა ვრცლად იმსჯელეს საკუთარ გამოცდილებებზე, როდესაც თავად ისინი, როგორც ქალი მოსამართლეები, დაექვემდებარნენ განსხვავებულ მოპყრობას გენდერული სტერეოტიპების გამო. მათ აგრეთვე ერთმანეთს გაუზიარეს ის მეთოდები, რასაც იყენებენ სასამართლო დარბაზში წესრიგის შენარჩუნების და ქალთა უფლებების დასაცავად, თუმცა იმგვარად, რომ მეორე მხარისთვის ეს მიკერძოებად არ იქნეს აღქმული.

შეხვედრის მნიშვნელოვან საკითხს წარმოადგენდა აგრეთვე სექსისტური გამონათქვამების საკითხი, განსაკუთრებით ადვოკატების გამოხატვის თავისუფლებასთან მიმართებით, მასზე რეაგირების პროპორციული ზომები და მექანიზმები და ადვოკატთა ეთიკის როლი ამ პრობლემის აღმოფხვრისთვის.

საბოლოოდ, მონაწილეები შეთანხმდნენ სხვა დაინტერესებულ მხარეებთან, მათ შორის ადვოკატებთან და სამოქალაქო საზოგადოების ორგანიზაციების წარმომადგენლებთან ამ საკითხზე მსჯელობის გაგრძელების საჭიროებაზე, რათა ერთობლივად იმოქმედონ გენდერული სტერეოტიპებისა და სექსისტური გამოხატვის წინააღმდეგ სასამართლოში.