ქალ მოსამართლეთა პროფესიული კომპეტენციის ამაღლებისა და უცხოელ კოლეგებთან პირდაპირი კომუნიკაციისთვის, ორი ქართველი მოსამართლე - ეკატერინე ზარნაძე თბილისის სააპელაციო სასამართლოდან და თამარ ხაჟომია თბილისის საქალაქო სასამართლოდან USAID სამართლის უზენაესობის პროგრამის მხარდაჭერით დაესწრნენ  ქალ მოსამართლეთა საერთაშორისო ასოციაციის კონფერენციას, რომელიც ორ წელიწადში ერთხელ იმართება და წელს მაროკოში ჩატარდა (11-15 მაისი, 2023).

მარაკეშში კონფერენციაზე შეიკრიბა ათასზე მეტი ქალი მოსამართლე 72 ქვეყნიდან, საქართველოს ჩათვლით. მათ იმსჯელეს იმ მიღწევებსა და გამოწვევებზე, რის წინაშეც დგანან ქალი მოსამართლეები მთელ მსოფლიოში. აქცენტი გაკეთდა ქალ მოსამართლეთა ჩართულობის გაზრდაზე ყველა მოქალაქისთვის ხელმისაწვდომი და სამართლიანი მართლმსაჯულების ხელშეწყობის საქმეში.

საპანელო დისკუსიები შეეხებოდა თემების ფართო არეალს, რომლებიც რელევანტურია ქალი მოსამართლეებისთვის, როგორიცაა სასამართლოში ქალების დაწინაურება ხელმძღვანელ პოზიციებზე, მარგინალიზებული  და სამართლებრივ დახმარებას მოკლებული ჯგუფებისთვის ინკლუზიური მართლმსაჯულების ინიციატივები, მრავალფეროვნების ხელშეწყობა სასამართლოში და სხვა. დამსწრეებმა ერთმანეთს გაუზიარეს ინფორმაცია საკუთარი მიღწევების და მიღებული გაკვეთილების შესახებ და განსაკუთრებით აღნიშნეს მათი როლი, ვინც მნიშვნელოვანი წვლილი შეიტანა ამ საქმეში ბოლო წლებში.

ქართულ დელეგაციაში შედიოდნენ მოსამართლე თამარ ხაჟომია, მოსამართლე ეკატერინე ზარნაძე (ქალების უფლებათა პრაქტიკის ჯგუფის წევრები), კანონის უზენაესობის პროგრამის მენეჯერი USAID/Caucasus-იდან, რუსუდან ტაბატაძე და USAID სამართლის უზენაესობის პროგრამის მართლმსაჯულების რეფორმის სპეციალისტი, ეკა ონიანი. ისინი აქტიურად იყვნენ ჩართულნი სესიებში, რომლებიც ეხებოდა ევროპის, შუა აზიის და ჩრდილოეთ აფრიკის (MENA) რეგიონს. დისკუსიები ეხებოდა ქალ მოსამართლეთა საერთაშორისო ასოციაციასა და საქართველოს შორის  თანამშრომლობის შესაძლებლობების გამოკვლევას.

მოსამართლე ხაჟომიას თქმით, კონფერენცია ფასდაუდებელი შესაძლებლობა იყო სხვა სამართლებრივი სისტემების, კულტურული მრავაფეროვნების და სხვადასხვა ქვეყნის ქალი მოსამართლეების წინაშე მდგომი გამოწვევებისა და მისწრაფებების შესახებ ინფორმაციის მისაღებად. „კონფერენციამ ხელი შეუწყო პირადი კონტაქტების დამყარებას უცხოელ კოლეგებთან და გაგვიმყარა მოსაზრება, რომ ევროპელ ქალ კოლეგებთან უფრო მჭიდრო კავშირები უნდა დავამყაროთ. ეს მნიშვნელოვანი იყო სამართლებრივი ცოდნის გასაღრმავებლად, სხვადასხვა კულტურის წარმომადგენლებთან საერთო ღირებულებების აღმოსაჩენად და თვალსაწიერის გასაფართოებლად “- განაცხადა მოსამართლე ხაჟომიამ.