საქართველოს 10 მოსამართლისაგან შემდგარი დელეგაცია თბილისის, რუსთავისა და გორის საქალაქო სასამართლოებიდან, ასევე, თბილისის სააპელაციო სასამართლოდან და სოხუმისა და გუდაუთის რაიონული სასამართლოდან ქ. ვაშინგტონში, კოლუმბიის ოლქი, და კალიფორნიის შტატში, ქ.ლოს-ანჯელესში გაემგზავრნენ შრომის უფლებებისა და მასთან დაკავშირებული საკითხების სასწავლო ვიზიტზე.

2024 წლის 15-26 აპრილს გამართულმა სასწავლო ვიზიტმა, რომელიც ორგანიზებული იყო ამერიკის იურისტთა ასოციაცია კანონის უზენაესობის ინიციატივას (ABA ROLI) მიერ USAID სამართლის უზენაესობის პროგრამასთან თანამშრომლობით, საქართველოს მოსამართლეებს მრავალფეროვანი გამოცდილება შესძინა სხვადასხვა სესიებსა და შეხვედრებში მონაწილეობით, სასამართლო პროცესებზე დაკვირვებით, რაც თავის მხრივ შრომით უფლებებსა და მასთან დაკავშირებულ საკითხებს მოიცავდა.

ვაშინგტონში ვიზიტი დაიწყო გაცნობითი ხასიათის სესიით, რომელსაც ABA ROLI-ს მომხსენებლები უძღვებოდნენ. მოსამართლეები ორგანიზაციის გლობალური მასშტაბის საქმიანობას გაეცნენ და ABA-ს სამოქალაქო უფლებებისა და სოციალური სამართლიანობის განყოფილების თავმჯდომარეს, რობინ რანჯს, შეხვდნენ. მოსამართლეები ასევე შეერთებული შტატების საერთაშორისო განვითარების სააგენტოს (USAID) ექსპერტებს შეხვდნენ, რომლებმაც საქართველოს მოსამართლეებს სააგენტოს როლი გააცნეს  მსოფლიოში ადამიანის უფლებების ხელშეწყობაში.

ლოს-ანჯელესში, დელეგაციამ შრომითი უფლებების საკითხების შესწავლა ისეთ ინსტიტუტებში განაგრძო, როგორიცაა სტენლი მოსკის სასამართლო სახლი და ლოს-ანჯელესის ოლქის, კალიფორნიის უმაღლესი სასამართლო. პროცესებზე დაკვირვებით, მოსამართლეებთან და სამართლის ექსპერტებთან საუბრით, საქართველოს მოსამართლეები პირადად გაეცნენ შრომის სამართლისა და პრაქტიკულ გამოწვევებს აშშ-ს სასამართლო სისტემაში.

სასწავლო ვიზიტის ერთ-ერთი გამორჩეული შეხვედრა Bet Tzedek-თან გაიმართა, რომელიც ლოს-ანჯელესის ცენტრში მდებარე არაკომერციული იურიდიული ფირმაა. დელეგაცია Bet Tzedek-ის პრეზიდენტსა და აღმასრულებელ დირექტორს დიეგო კარტახენას და დასაქმების ჯგუფის ხელმძღვანელს, მერი როსს შეხვდა. სამუშაო სესიაზე ისაუბრეს Bet Tzedek-ის ძალისხმევაზე უზრუნველყოს სამართლიანობაზე თანაბარი ხელმისაწვდომობა ყველასთვის, განსაკუთრებით შრომითი უფლებებისა და დასაქმების კანონმდებლობის სფეროში.

სასწავლო ვიზიტი ასევე მოიცავდა საინფორმაციო შეხვედრებს ისეთ ორგანიზაციებთან, როგორიცაა შრომის უსაფრთხოებისა და ჯანმრთელობის დაცვის ადმინისტრაცია (OSHA), ვაშინგტონის ადვოკატთა სამოქალაქო უფლებებისა და ურბანული საკითხების კომიტეტი და ქალთა სამართლის ეროვნულ ცენტრი, სადაც მოსამართლეები გაეცნენ ინფორმაციას შრომითი ურთიერთობების მარეგულირებელი წესებისა და მასთან დაკავშირებული უფლება-მოვალეობების სხვადასხვა ასპექტების შესახებ, მათ შორის უფლებების ადვოკატირებასა და სამართალწარმოების პროცესზე.