2023 წლის 24 ოქტომბერს ქუთაისის მე-2 საჯარო სკოლაში, ქუთაისის საქალაქო სასამართლოს მოსამართლე და ბავშვთა უფლებების პრაქტიკის ჯგუფის წევრი, მიხეილ ბებიაშვილი 100-ზე მეტ მოსწავლეს შეხვდა.

მოსწავლეები წარმოადგენდნენ სამოქალაქო განათლების კლუბებს ქუთაისის შვიდი საჯარო სკოლიდან. ღონისძიება USAID სამართლის უზენაესობის პროგრამის და USAID სამოქალაქო განათლების პროგრამის თანამშრომლობის ფარგლებში შედგა და ნაწილია საინფორმაციო შეხვედრების სერიისა, რომელიც აერთიანებს მოსამართლეებსა და საშუალო სკოლის მოსწავლეებს, რათა ხელი შეეწყოს მოსამართლის პროფესიის პოპულარიზაციას და დიალოგს ახალ თაობასა და სასამართლო ხელისუფლებას შორის.

შეხვედრის დაწყებამდე მოსწავლეებმა მოსამართლეს უამბეს ადამიანის უფლებებთან დაკავშირებული იმ პროექტების შესახებ, რომლებიც მათ USAID სამოქალაქო განათლების ინიციატივის ფარგლებში განახორციელეს. შემდგომში, მოსამართლე მიხეილ ბებიაშვილმა ისაუბრა ხელისუფლების დანაწილების კონცეფციის, სახელმწიფო ინსტიტუტების როლის, სასამართლო ხელისუფლების მნიშვნელობისა და ცალკეული მოსამართლეების პასუხისმგებლობის შესახებ. მან მოსწავლეებს ასევე განუმარტა ცალკეული სამართლებრივი მექანიზმები, რომლებიც არსებობს ფუნდამენტური უფლებების დასაცავად. ასევე უპასუხა მათ კითხვებს ისეთ თემებზე, როგორიცაა ბავშვთა უფლებები, ოჯახში ძალადობის მსხვერპლთა დახმარების მეთოდები და სახელმწიფო ინსტიტუტების როლი უფლებების დაცვასა და მსხვერპლთა მხარდაჭერაში.

მოსამართლემ ასევე ისაუბრა იმ პრეცედენტების შესახებ, რომლებიც განსაკუთრებული მნიშვნელობისაა ბავშვთა უფლებების სფეროში.