საქართველოს მედიატორთა ასოციაციამ, USAID სამართლის უზენაესობის პროგრამის მხარდაჭერით, მედიატორთა შეხვედრას უმასპინძლა, რაც გამოცდილების გაზიარებას ისახავდა მიზნად და მედიატორთა პროფესიულ ზრდასა და საქართველოში მედიაციის პრაქტიკის განვითარებას ემსახურებოდა. 

თავის მისასალმებელ სიტყვაში, ირაკლი ყანდაშვილმა, საქართველოს მედიატორთა ასოციაციის თავმჯდომარემ ხაზი გაუსვა კოლეგებს შორის გამოცდილების გაზიარების მნიშვნელობას. ეს განსაკუთრებით აუცილებელია ასოციაციის ახალი წევრებისათვის, რომლებსაც მედიაციის პრაქტიკის ნიუანსებში გარკვევა ესაჭიროებათ. ირაკლი ყანდაშვილის თქმით, ბოლო 5 თვის განმავლობაში ასოციაციას 35 ახალი წევრი შეემატა, ხოლო 40 ადამიანი კი, დაინტერესებულია მედიატორის პროფესიაში შესვლით. ახალი წევრების რაოდენობის ზრდასთან ერთად, მნიშვნელოვანია 3 ივნისის შეხვედრის მსგავსი პლატფორმის არსებობა, სადაც ასოციაციის წევრები დაგროვილი პროფესიული გამოცდილების გაზიარებას შეძლებენ.   

შეხვედრას უძღვებოდნენ ელენე ორჯონიკიძე და ნათია ჩიტაშვილი, თბილისის საქალაქო სასამართლოსა და  მცხეთის რაიონული სასამართლოს მედიაციის ცენტრების კოორდინატორები (ორივე მათგანი სერტიფიცირებული სასამართლო მედიატორია), რომლებმაც ცენტრებში არსებულ პრაქტიკასა და საქმიანობის განხორციელებისას არსებულ გამოწვევებზე ისაუბრეს. არჩილ ცერცვაძემ, საქართველოს სადაზღვევო კომპანიათა ასოციაციის წარმომადგენელმა და მედიატორმა, რომელიც დაზღვევის საკითხების სპეციალისტია, მონაწილეებს კერძო მედიაციის მიმართულებით საკუთარი გამოცდილება გაუზიარა. მისი თქმით, სადაზღვევო ხელშეკრულებებში მხარეები აფიქსირებენ მედიაციას, როგორც დავის გადაჭრის გზას და ასოციაციას კვარტალში საშუალოდ 200-300 მიმართვა აქვს. ბ-ნი ცერცვაძის განცხადებით, მხოლოდ ერთეულები მიდიან სასამართლოში და რომ მომხმარებელთა 90% კმაყოფილია მიღებული სერვისით.  

შეხვედრას ოცდაერთი მედიატორი დაესწრო. აქტიური ჩართულობით მიმდინარე სესია კითხვა-პასუხის რეჟიმში გაგრძელდა, რომლის დროსაც მონაწილეებს საშუალება მიეცათ მათთვის საინტერესო საკითხებზე ინფორმაცია მიეღოთ. შეხვედრაზე შემდეგი საკითხები განიხილეს: კერძო და სასამართლო მედიაციის თავისებურებები, აღსრულების ნაწილში არსებული სირთულეები და მათი გადაჭრის გზები, ის გამოწვევები, რაც თანამედიაციის პროცესში  არსებობს. მონაწილეებმა ასევე იმსჯელეს მედიატორთა სერტიფიცირების პროგრამის მესამე ეტაპის გაუმჯობესების საკითხზე.

მედიატორთა ასოციაცია რეგულარულად აწყობს მსგავს შეხვედრებს, რადგან მიიჩნევს, რომ მედიაციის ინსტიტუტის გაძლიერების საქმეში მნიშვნელოვანია გამოცდილების გაზიარება და ღია დიალოგი. ამგვარი შეხვედრები ქმნის ისეთ გარემოს, სადაც ხდება გამოწვევების ღიად განხილვა, რაც ხელს უწყობს საქართველოში მედიაციის პრაქტიკის გაუმჯობესებასა და განვითარებას.